Politique

Partagé sur :
• facebook

Mihetsiketsika fatratra ary tena somebiseby ny ao amin’ny CENIT nandray ireo fitaovana hampiasaina amin’ny fifidianana tahaka ny bileta tokana sy ny taratasy hanaovana ny PV. Ho azy ireo dia tomombana ny fepetra ara-teknika hiatrehana ny fifidianana na dia tsy mbola mazava tsara aza na efa tena am-pelatanana daholo ireo 19,8 tapitrisa dolara tetibola ilaina na tsia

. Mampiahiahy ny maro ihany anefa ny tena hahatanterahan’ity fifidianana kaominaly amin’ny 31 jolay ho avy izao ity noho ny fisian’ny olana maro tsy mety ahitam-bahaolana eto amin’ny firenena.

Olana maro lafy

Tato ho ato izay dia misy ny vondron’olona sy vondrona antoko politika mitaky ny hanafoanana na hampihemorana ny fifidianana. Ho azy ireo dia mety hiteraka korontana ny fanaovana io fifidianana io. Eo koa ireo mitaky ny hanasoniavan’ny depiote sy ny filoham-pirenena ilay « pacte de stabilité ». Hita anefa fa efa mody fanina amin’io ingahy filoha. Ankoatra izay dia mampimenomenona ny olona ny fifidianana mialoha ny fotoana ataon’ny antokon’ny fitondrana any amin’ny faritra maro manerana ny nosy, ary na ny filoham-pirenena aza indraindray dia mitokana zava-bita no sady mampisongadina ihany ny HVM. Tsy tongatonga ho azy ny fisian’ny fiofanana nanomboka omaly ka maharitra 5 andro momba ny « fisorohana sy fifehezana ny korontana mety hitranga manodidina ny fifidianana ». Azo adika avy hatrany io fa manahy ny mety hisian’ny korontana ny eoropeanina ka mikarakara izao fiofanana izao ho an’ny mpiasan’ny haino aman-jery sy ireo fiarahamonim-pirenena. Farany dia tsy mbola milamina na iray aza ireo fitokonana sy fitakiana misy. Iray volana sy tapany izao no nitokona ny mpiasan’ny fananantany, eo ihany koa ny Air Madagascar, taitra tamin’ny torimasony ireo mpitsabo mpanampy, hanao fitokonana tsy voafetra ihany koa ireo mpampianatra mpikaroka eny amin’ny oniversite.

Bodongerona

Ho tanteraka an-tsakany sy an-davany ihany ve ny fifidianana ao anatin’izany savorovoro rehetra izany ? Ny fampielezan-kevitra aza dia mifanotona amin’ny vanim-potoana hanombohana ny fanadinam-panjakana CEPE. Sa tsy miraharaha izay hahasoa ny firenena marina ny mpitondra ankehitriny ka hanao bodongerona hiroso amin’ny zavatra hita fa efa hiteraka krizy vaovao hafa indray ?

Ragasy : tena fanina ny bandy e ! Amin’ity taona ity moa izany misy fifidianana sa ahoana e ?

RTT

Tia Tanindrazana

Samia mijoro ho an'i Gasikara.