Politique

Raharaham-pirenena Hatao anaty fahavaratra ny fifidianana

Politique
Sabotsy 30 Jona 2018

Miditra amin`ny kihon-dalana farany amin` ny fanomanana ny fifidianana isika satria tapaka taorian`ny fanapahan-kevitra no raisin`ny Filankevitry ny governemanta ireo daty ofisialy hanatanterahana izany fifidianana izany.

Araka ny tatitra navoakan`ny praiminisitra lehiben`ny governemanta omaly dia hotanterahina ny 07 novambra ny fihodianana voalohany amin` izany fifidianana ho filoham-pirenena izany ary ary raha misy kosa ny fihodianana faharoa dia ny 19 Desambra 2018 ; daty roa izay samy ao anatin’ny vanim-potoan’ny orana eto Madagasikara ireo ary manohitra avy hatrany ilay soso-kevitry ny HCC nivoaka tamin’ny 25 mey hoe atao ao anatin’ny main-tany ny fifidianana. Nohamafisin’ny Lehiben’ny Governemanta fa anjaran’ ireo sampandraharaham-panjakana sy ny CENI no mandray andraikitra amin’ny fikarakarana ny fifidianana, amin’ireo daty voatondro ireo. Mipetraka eto ny fanontaniana : matoa ve nivoaka ny datim-pifidianana dia vonona avokoa ve ireo tetibola ilaina mahakasika ny fanatanterahina ny fifidianana? Mipetraka mantsy ny ady hevitra mikasika ny entin-manana ao anatin`izay fanatanterahina fifidianana izay. Ny teo anivon`ny CENI dia nilaza fa mbola misy vola eo amin`ny 17 Miliara Ar no tsy maintsy ho tadiavina hanatontosana izany. Ny antony dia mbola misy tsy feno eo amin`ny fampitaovana samihafa tao aorian`ny nandaniana ny lalam-pifidianana. Ny lalàna mifehy ny fifidianana izay nanome fepetra vaovao toy ny hoe ny famoronana birao fandatsaham-bato hatramin`ny 5 000 ary santionana ireo. Hatreto dia andrasana raha hifanaraka amin`ireo antoko politika tsirairay avy ity datim-pifidianana nivoaka ity fa ho hita eo ihany ny fanehoan-kevitra maro samihafa izay ho ataon`ireo antoko sy vondron-kery politika ireo. Ny azo ambara aloha dia hiatrika fifidianana ny firenena sy ny vahoaka ary kihon-dalana iray ahafahan'ny vahoaka mametraka ny safidiny ny fifidianana. Ho hita eo raha hitondra fitoniana sy fandrosoana ity fifidianana 2018 ity.