Politique

Partagé sur :
• facebook

Nitondra fanazavana ho an`ny vahoaka tetsy amin`ny kianja mitafon`i Mahamasina mahakasika ny fifidianana sy ny datim-pifidianana ireo antoko politika, sendikà ary ny fiarahamonim-pirenena omaly. Nitarika adihevitra mikasika ny fifidianana hotanterahina eto amin`ny firenena ihany koa.

Mampiteraka ahiahy, hoy izy ireo, ny fangaraharana amin`ny fanatanterahana ny fifidianana eto amin`ny firenena raha ny datim-pifidianana naroson`ny governemanta. Efa ao anatin`ny vanim-potoana ny orana ny 19 desambra raha ny fanazavana nataon`i Marc Ramiaranjatovo. Nihena ihany koa ny fe-potoana hanangonana ny vokatra ka hampananosarotra ny fametrahana ny fangaraharana ary mifanipaka velively amin`ny lalàmpanorenana. Ho an`ireo antoko politika dia tokony ho eritreretina dieny izao ny fanemorana ny datim-pifidianana mba ahafahana ny antoko politika sy ny vahoaka miatrika izany am-pitoniana. Rariny raha hahemotra amin`ny main-tany satria manjary hiteraka krizy indray. Notsindriany ihany koa fa marefo dia marefo ny toedraharaha ara-politika, ara-toekarena ary ara-tsosialy eto Madagasikara. Antsoina ny hery velona rehetra hiara-kandinika ny amin`ny tokony hatao ny amin`ny fihavanam-pirenena, amin`ny fanatsarana ny fitantanan-draharaham-panjakana, fijerena akaiky ny lalàmpanorenana sy ny lalàm-pifidianana, ary indrindra ny fanorenana ifotony. Ireo no teboka mila dinihana maika, hoy ny ben`ny tanànan`i Alasora ary aorian`izay vao manomana fifidianana, hoy hatrany ny fanazavana. Fihaonana natao hanazavana amin`ny vahoaka, ny eo anivon`ny mpitondra, indrindra ny sehatra iraisam-pirenena no tanjona tamin`ity hetsika ity ary samy nitondra hevitra ny mpandray anjara fa hahemotra ny fifidianana ka aleo mifandamina sy mifampiresaka.

Marigny A.

Tia Tanindrazana

Samia mijoro ho an'i Gasikara.