Politique

Partagé sur :
• facebook

Ny ekipan’ny tetezamita sy ny HVM no tena manam-pahaizana amin’io politikan’ny fankahalana sy kapa vavaranjo io, ary manomboka tsy misy ankitsitsy izy io amin’izao vanim-potoana akaiky fifidianana izao. Mahavita mamorona ny tsy misy mihitsy hahafahana manenjika sy manasoketa ny hafa sy hanapotehana azy.

Fomba fiady ampiasaina io rehefa tsy manan-kevitra mitombina intsony, ka ny halako bika tsy tiko tarehy no ezahina hafafy, izay fomba fiadin’ny kanosa ihany. Novoizina tany amin’ny taona 2009 nisian’ny fanonganam-panjakana ny fanosoram-potaka samihafa nentina nandotoana an’i Marc Ravalomanana, ka dia ireny niaraha-nahita ireny ny zava-niseho. Marary ny fon’i Andry Rajoelina ankehitriny vao voakitika kely satria noresahin’ny gazetin’ny fitondrana HVM izay napetrany ny momba ny zanany. Lojika be izany, ary zony ny miaro ny ankohonany saingy safidiny ihany koa ny hitondra ny zanany anaty famoriam-bahoaka ara-politika, izay mety hiteraka tsikera ho an’ny mpitazana, hoy ny fanehoan-kevitra sasany. Manao vain-drahalahy tsy mba marary ihany koa anefa ary minia manadino ny tantara. Odiana tsy tadidy ve ny antsojay nataon’ny olon’ny tetezamita tamin’ny mpomba an-dRavalomanana ? Tsy tsaroana ve ny resaka saika hakana an-keriny ny zanaky ny filoha Ravalomanana tamin’ny janoary 2009 ? Mifanao an’io indray ny HVM sy ny MAPAR ankehitriny, izay efa zatra mifamoaka dosie maloto hifanaratsiana satria niara-nihosina tao anaty tetezamita sy mifankahalala afera maloto. Asa na inona indray no hiseho ato ho ato?

Toky R

Tia Tanindrazana

Samia mijoro ho an'i Gasikara.