Politique

Victor Manantsoa HFI “”Ny fihaonambem-pirenena ihany no vahaolana”

Politique
Talata 20 Novambra 2018

Nivoaka tamin’ny fahanginana omaly Atoa Manantsoa Victor mpikambana eo anivon’ny hetsiky ny fanorenana ifotony na ny HFI.

Nambarany fa ny nisorohana ny zava-mitranga eto amin’ny firenena amin’izao fotoana mihitsy izay mampisavorovoro ny saim-bahoaka no nahatonga azy ireo nilaza hatramin’izay fa tokony hapetraka aloha ny fanorenana ifotony vao hisorohana ny fifidianana. Tsy nisy mpihaino anefa izahay ka izao iaraha-mahita izao no vokany. Samy tsy misy manaiky ny voka-pifidianana avokoa ireo kandida nilatsaka hofidiana izay tena zava-doza ho an’ny firenena Malagasy sady mahamenatra, hoy ny HFI. Soa ihany anefa fa mbola misy ny Malagasy tia fihavanana sy manam-pahendrena ka tsy mbola nisy ny fifamonoana hatreto. Miantso ny hanafoanana iny fifidianana notanterahina tamin’ny 7 novambra lasa teo iny Atoa Manantsoa Victor sy ireo mpikambana eo anivon’ny HFI miaraka aminy mba hahafahan’ny Malagasy miatrika ny hoaviny. Ankoatra izay dia mitaky ny hanatanterahana ny fihaonambem-pirenena koa izy ireo tarihin’ireo ray aman-dreny ara-drazana sy ara-pinoana eto amintsika. Antsoina ho avy hanatrika izany avokoa ireo kandida rehetra nilatsaka hofidiana ho filoham-pirenena farany teo hahafahana mitady vahaolana, hoy hatrany Atoa Victor Manantsoa.

Pati