Politique

Partagé sur :
• facebook

Hatramin’ny fahaleovantena no ho mankaty dia efa an’aliny ireo tanora mahay mitam-basy no miriorio any anaty fiarahamonina any fotsiny na an-drenivohitra na ambanivohitra saingy tsy misy politika mazava ny fanjakana hanomezana andraikitra azy ireo ka mahamora ny fanararaotana azy ireo

. Tsy azo ambara ho milamina mihitsy ny toe-draharaha politika eto Madagasikara. Nandritra ny  fihaonany tamin’ny mpanao gazety dia nanambara Atoa Justin Andrianirina, filohan’ny « Mizatra » ( SN-VSN-Veuves)  na ny fikambanan’ny miaramila, zandary , ireo  izay nandalo ny  service  nationale  fahiny sy ireo  nanao ny  service légale teo anivon’ny Foloalindahy ary ny vadin’ny  Foloalindahy  maty am-perinasa fa misy  mpanao  politika mamory rezervista  indray any  ho any mba hanakorontana sy  hanao milisy hiaro ny tombontsoa sy firehana politika. Mampalahelo ny  toe-javatra toy izany satria dia karamaina hifamono indray ny samy Malagasy mba hakana fahefana »,  hoy Atoa  Justin Adrianirina. Mananatra ny tanora malagasy mahay mitana basy sy izay efa nandalo ny fiofanana miaramila ny tena mba tsy hanaiky ny hataon’ny  mpanao politika fitaovana.   Tadidio ny  nahazo ny rezervista tamin’ny taona 2002, hoy ity filohan’ny Mizatra  ity fa  baomba mandatsa-dranomaso no valin’ny  fitakiana nataon’izy ireo tamin’izany fotoana. Tsy  nambaran’Atoa Justin Andrianirina kosa fa nisy  tafahoatra ny  fangatahana napetrak’ireo  rezervista  tamin’ny taona 2002.

Esory izay tsy mamely

Nanipy teny ho an’ny Filoham-pirenena  ihany koa ny  fikambanana « Mizatra » ny hanalany  ao anatin’ny  ekipany ireo  izay tsy mahomby fa  ny  vy tsy  mikitrana irery. Ho an’ny  Solombavambahoaka indray dia nanambaa Atoa Justin Andrianirina fa tokony hijoro amin’ny maha mpitondra tenin’ny vahoaka azy izy ireo. Tsara ny mikapo-janaka fa raha hamono  vahoaka kosa dia mila fandinihana, hoy ny filohan’ny « Mizatra ». Ambonin’izay dia niteny mafy ny mpanao politka izay zatra manao fitaovana sy manao tsinontsinona ny   mpitandro ny  filaminana ny filohan’ny « Mizatra ». Toa  lasa mpanompo  mpanao politika ny   Foloalindahy, hoy ny  nambarany fa tsy hanompo  vahoaka toy ny niantsoana azy hatramin’ny taona 1960 intsony. Nanambara moa ity fikambanana ity fa tsy  nieritreritra ny handray anjara amin’ny fitantanana ny firenena raha tsy  amin’ny toe-javatra  mifanaraka amin’ny  filan’ny vahoaka sy manaja ny lalàna velona ihany koa. Ankehitriny  dia manenika ny faritra 15 amin’ny 22 misy ny « Mizatra » ary ahitana mpikambana sivily ihany koa. Ho an’Antananarivo dia hisy hetsika   manokana  hananganana ny  birao eto  anivon-tany ary  homarihina amin’ny  hetsika « Rodorodo » lehibe izany araka ny nambaran’ny  filohan’ny fikambanana ihany.

Andry Ratovo                   

Tia Tanindrazana

Samia mijoro ho an'i Gasikara.