Politique

Tsy manaiky hampiadiana intsony Hifidy an-dRavalo ny ambany tanàna

Politique
Talata 11 Desambra 2018

Noporofoin’i Marc Ravalomanana kandida faha-25 sy ny vahoaka eny ambany tanàna fa tsy marina ny filazana, fa olona manavakavaka izy ary tsy tia ny vahoaka madinika eny ambany tanàna sy ny olona any amin’ny faritra, araka ny resaka voizin’ny mpampisara-bazana.

Faritra iva maro teto Antananarivo no notsidihiny omaly. Voalohany ny Andavamamba niarahany nihosona tamin’ny vahoaka an-kafaliana. Niara-dia tamin’i Dada i Neny Lalao Ravalomanana izay notronin’ireo vahoaka avy amin’ny fikambanana Ambalambahoaka, eny amin’ny faritra iva. Nohamafisin’i Marc Ravalomanana tamin’ny mponin’Andavamamba fa tena tia ny Ambalambahoaka izy, fa tsy araka fanaratsiana azy. Tsy tenenina amin’ny vava fotsiny na averimberina isan’andro anefa izany, hoy izy, fa tsy maintsy porofoina amin’ny asa ny fitiavana ny vahoaka. Aza matahotra ianareo fa ao anatin’ny 100 andro dia hataontsika milamina sy mahafinaritra ny tanàna toa an’Andavamamba. Ny resaka fako eto Antananarivo indray, raha vao tonga eo amin’ny toerana isika dia ho avy ny bakan-jaoridira marobe hanadiovana ny tanàna, toy ny nisy tamin’ny taona 2002, fa manàna faharetana kely ianareo. Ankoatra izay, tsy nijery fotsiny ireo mpanasa lamba tao amin’ny toeram-panasan-damba ao Isotry tetezan’i Bekiraro i Neny Lalao Ravalomanana, fa nijery ny tokony hanampiana ireo mpikarama matihanina renim-pianakaviana an-jatony tao an-toerana. Notolorany fitaovana toy ny koveta, siny, savony … ny fikambanan’ny mpanasa lamba ho fanampiana azy ireo. Nisy ihany koa ny fizarana T- shirt mahakasika ny fanentanana amin’ny tokony hanadiovana ny tanàna satria zava-dehibe ho an’Antananarivo, hoy izy, ny miaina ao anaty fahadiovana amin’ny maha soa iombonan’ny Malagasy azy. Faly ireo mpanasa lamba tamin’ny fanomezana nataon’i Neny satria tena miaina ao anaty fahasahiranana lalina. Nitohy teny Anosibe Mandrangobato ny fihaonan’i Neny Lalao Ravalomanana tamin’ireo vahoaka, na tsy afaka niaraka taminy aza ny kandida Marc Ravalomanana izay nihazo ny Atsimon’ny Nosy. Nampanantena ireo fikambanana Ambalambahoaka fa hanaraka ny filoha Ravalomanana ary hanao izay hampandany azy eny amin’ny faritra iva. Tia anay i Dada, hoy izy ireo, fa tsy marina ny filazàna fa mpanavakavaka izany izy. Mailo izahay Ambalambahoaka amin’izao fihodinana faha 2 izao, fa tsy toy ny tamin’ny fihodinana voalohany, ka hanara-maso akaiky sao misy mitady hangala-bato eo, hoy ny Ambalambahoaka. Nanome toky fa hiakatra ambony ny vaton’ny filoha Marc Ravalomanana eny amin’ny faritra iva.