Politique

Partagé sur :
• facebook

Hiara-kiasa amin’ny mpanao gazety amin’ny fampahafantarana an-karihary ny asany sy amin’ny fanadihadiana fikarohana kolikoly ny birao mahaleotena miady amin’ny kolikoly manomboka izao.

« Araka ny anarany  dia mahaleo tena ny Birao mahaleotena miady amin’ny kolikoly  na Bianco », hoy andriamatoa  Jean Louis  Andriamifidy  tale jeneralin’ity sampan’asa ity  omaly nandritra ny fihaonany tamin’ireo  tompon’orinasa mikirakira haino aman-jery  sy gazety an-tsoratra niaraka  tamin’ireo  tonian-dahatsoratra teny  amin’ny hotely Ibis teny Ankorondrano. Tao  anatin’ny herintaona  izay nandraisany ny fitantanana ny Bianco dia nanamafy ny tenany fa tsy mbola nandray  faneriterena na  an-kolaka na mivantana avy tamin’ny Filoham-pirenena na ny praiminisitra momba ny asany Atoa Jean Louis Andriamifidy. Tsaratsara kokoa raha tsy  miankina amin’ny fiadidiana ny Repoblika intsony ny Bianco mba hanehoana amin’ny vahoaka manontolo ny fahaleovantenany, hoy izy.

 Tao  anatin’ny folo taona niforonany mantsy  dia  tsy tratra ny tanjona  notratrarina tamin’ny ady amin’ny kolikoly ataon’ity  sampan’asa ity. Vao  mainka aza niroborobo taorian’ny  krizy 2009 ka   nahatonga azy ireo hampihatra paik’ady vaovao manomboka izao.

Trondro vaventy

Hametraka  fiaraha-miasa matotra amin’ny mpanao gazety ny  Bianco manomboka izao ka  tsy hiandry intsony ny fitarainana ho tonga eny aminy fa raha vao mahita trangana kolikoly ao anaty gazety na eny amin’ny haino aman-jery dia hanokatra fanadihadiana avy hatrany. No marihin’ny Tale jeneralin’ny Bianco  anefa fa hatao ao antin’ny fanarahan-dalàna tsara ny fomba fiasa ka hohajaina ny zon’ny olona rehetra hahalala vaovao saingy tandremana toy ny anakandriamaso ihany koa ny zo fenon’ny tsirairay  alohan’ny fanamelohan’ny fitsarana  azy (présomption  d’innocence). Tsy maintsy  hajaina koa  ireo fepetra sy dingana mifehy ny asan’ny Bianco. Matetika mantsy dia ireo  kolikoly madininka ihany no  hita sy voaresaka fa ireo « trondro vaventy » tsy tratra mihitsy noho izy ireo misy mpiaro, hoy hatrany Atoa Jean Louis Andriamifidy izay mpitsara rahateo. Tsy hikombonkombona amin’ny  fampahalalam-baovao noho izany intsony koa ny Bianco fa hiezaka hanova fomba fiasa ka hampahafantatra izay asa ataony amin’ny  alalan’ny gazety sy ny dingana izay mety hampikatso  ny fanadihadiana ataon’izy ireo rehefa sendra ireny raharaha lehibe mahakasika olona ambony ireny. Ho an’ny  mpanao gazety kosa dia andrasana amin’izy ireo ny fanaovana fanadihadiana tena marina ka hiavaka tsara amin’izay fotoana izay ny fitarainana sy ny fanaratsiana olona be fahatany  sy ny fanadihadiana matihanina. Ankoatra ny fitaterana tranga dia hiarahan’ny Bianco sy ny mpanao gazety  miasa ihany koa ny fitaizana sy ny fanabeazana ny fiarahamonina  amin’ny ady amin’ny kolikoly. Fandaharan’asa iarahana amin’ny mpamatsy vola vahiny ity tetikasa vaovaon’ny Bianco ity ary efa misy ny sora-bola hiasana amin’izany.

Andry Ratovo  

Tia Tanindrazana

Samia mijoro ho an'i Gasikara.