Politique

Solontenam-panjakana manao fampielezan-kevitra Mety hiafara amin’ny fanagadrana mihitsy

Politique
Talata 09 Oktobra 2018

Nisokatra omaly ny fampielezan-kevitra ary hifarana amin’ny 6 novambra amin’ny 12 ora alina.

Nisy ny fampahatsiahivana natao tetsy amin’ny minisiteran’ny atitany sy ny fitsinjaram-pahefana mahakasika ny didy aman-dalàna mifehy ny solontenam-panjakana manoloana izao andron’ny fampielezan-kevitra izao. Nanambara ny minisitra Razafimahefa Tianarivelo fa tsy handefitra mihitsy amin’ireo solontenam-panjakana tahaka ny prefe, ny sefo distrika, ny lehiben’ny boriborintany sy ny sefo fokontany tratra manao fampielezan-kevitra. Tokony hitana ny adidy aman’andraikiny izy ireo ary tsy hiandany na amin’iza na amin’iza. Ankoatra izay dia tsy mahazo mampiasa ny fitaovam-panjakana na maniraka ny olona feheziny hanatanteraka fampielezan-kevitra ireo mpiasam-panjakana ireo. Ny tsy fanarahana ny lalàna dia hanafoana ny vato tokony ho azon’ny kandida tohanan’izy ireo, indrindra hiteraka fanagadrana mihitsy. Nilaza ny minisitra fa ireo no tompon’andraikitra voalohany amin’ny filaminam-bahoaka ankoatra ny mpitandro ny filaminana manoloana izao famoriam-bahoaka etsy sy eroa izao. Izy ireo ihany koa no mampahafantatra ny toerana azo anaovana fihetsiketsehana rehefa avy nanao fangatahana 48 ora mialoha any amin’ny kaominina ireo kandida.

Tsirinasolo