Politique

Ramtane Lamamra “Anjaran’ny samy Malagasy ny mitady marimaritra iraisana”

Politique
Zoma 07 Septambra 2018

« Mitazona ny datin’ny 7 novambra sy 19 desambra hanatanterahana ny fifidianana filoham-pirenena ny governemanta”.

Io no tenin’ny praiminisitra Ntsay Christian, taorian’ny fihaonany tamin’ny delegasionan’ny Vondrona Afrikanina notarihin’ny ambasadaoro Ramtane Lamamra teny amin’ny lapan’i Mahazoarivo.

Notsihiavin’ny praiminisitra fa manaja ny fahalalahana amin’ny fanehoan-kevitra ny governemanta kanefa jerena kosa ny hahatomombana ny fizorantsika amin’ny fanomanana sy fanatanterahana ny fifidianana ka anisan’ny hahatongavana amin’izany ny fitoniana sy ny fifehezana ny filaminana. Tanjona ny hahazoana voka-pifidianana araka ny safidin’ny olom-pirenena tsirairay.

Fanaovana tombana mahakasika ny fiomanan’i Madagasikara amin’ny fifidianana rahateo no anton-dian’ity delegasiona avy amin’ny Vondrona Afrikanina ity. Manoloana ny tsy fitovian-kevitra politika misy amin’izao fotoana izao, dia nanambara Ramtane Lamamra fa manaja ny fiandrianan’ny firenena malagasy, izany hoe anjaran’ny samy Malagasy ny mitady marimaritra iraisana amin’ny olana anatiny eto Madagasikara, hoy izy. Ny Vondrona Afrikanina kosa dia hanampy antsika hatrany amin’ny fanomanana ny fifidianana sy amin’ny fanaraha-maso ireo didy navoakan’ny Fitsarana Avo momba ny Lalàmpanorenana ary ireo toromarika napetraky ny governemanta.

Nangonin’i Jean D.