Politique

Partagé sur :
• facebook

Nisaotra ny filoham-pirenena teo aloha Marc Ravalomanana ny praiminisitra ny Jeneraly Jean Ravelonarivo. « Fihetsika maneho fitiavan-tanindrazana sy modely ho an’ny fampihavanam-pirenena ny fihetsika nasehon’Atoa Marc Ravalomanana nampiato ny fihetseketsehana teny amin’ny Magro », hoy ny praiminisitra. Hankalaza tsy ho ela ny 29 martsa i Madagasikara izao ka ho an’ny Jeneraly Jean Ravelonarivo dia tsy very maina ny ezaka nataon’ireo Raiamandreny taloha nandatsaka ny rany ho an’ny tanindrazana. Ohatra iray lehibe amin’ny fiaraha-miasa hanarenana ny fiainam-pirenena izao ataon’ Atoa Marc Ravalomanana izao ka tokony halain-tahaka hoy ny lehiben’ny governemanta izay nanao antso avo amin’ny mpiray tanindrazana mba hiara –miasa.

Nivoaka ny vola

Omaly nandritra ny fandraisana ireo solontenan’ny « Banque  Européenne  pour l’investissement » na BE I sy ny masoivohon’ny Vondrona Eoropeanina  dia nanambara ny praiminisitra  fa ny avy any ivelany aza antsoina hiara-miasa  mba hampandrosoana ny firenena  ka tsy tokony hisalasala ny mpiray tanindrazana hiditra an-tsehatra. Telo andro  aty aorian’ny nampiatoana ny hetsika teny amin’ny Magro dia tonga ny vondrona Eoropeanina sy ny BEI nanao ny fanambarana amin’ny fahavononan’izy ireo hiara-miasa amin’i Madagasikara. 75 tapitrisa euros  hamatsiana ny rano fisotro madio, ho fanatsarana ny tontolon’ny herinaratra. 60 tapitrisa euros hafa mbola hanatsarana ny momba ny famatsiana herinaratra sy ny rano fisotro madio ihany. 395 tapitrisa euros ho an’ny fanamboaran-dalana ho an’ny lalam-pirenena faha 13, faha-6, faha-12 A sy ny faha-5 A..  Ho fanarenana ny orinasa Jirama ihany koa dia hanokana 25 tapitrisa euros izay hamatsiana  milina faha-4 ho an’Andekaleka ihany koa ny BEI sy ny vondrona Eoropeanina. Ho fanampiana an’i Madagasikara  taorian’ny tondra-drano sy rivodoza dia miandry ny fanambarana izay ilain’ny governemanta Malagasy ny BEI.

Andry Ratovo  

Tia Tanindrazana

Samia mijoro ho an'i Gasikara.