Politique

Partagé sur :
• facebook

Teboka dimy no nasongadin’ny Filohan’ny Repoblika omaly nandritra ny fanokafana ny atrikasa momba ny fametrahana rafitra hampiharana ny politika nasionaly momba ny fampandrosoana, dia ny fahavononana politika sy fahaiza-mitantana,Vina sy sori-dalana stratejika voafaritra mazava tsara, Drafitra sy fandaharan’asam-pirenena voarafitra tsara, Fitaovana sy fomba fiasa mifanaraka amin’ny zava-misy ary Vokatra azo tsapain-tanana.

Haharitra hatramin’ny alahady 12 aprily izy io. Mba hahatontosa ireo, hoy ny Filoha dia tokony haneho fahavononana sy  fahaiza-manao ny mpitondra ka tsy handiso fanantenana ny vahoaka izay nifidy. Tsy ny vahoaka ihany fa mbola anjaran’ny mpitondra isan-tsokajiny eny anivon’ny minisitera sy ny andrim-panjakana samihafa no mampiseho finiavana  hanao ny asany ao anatin’ny mangarahara  mba hampatoky ny mpamatsy vola  sy ireo firenena vahiny miara-miasa amin’i Madagasikara.  

Tsy misy vola

Raha nandray fitenenana kosa ny praiminisitra dia nanambara fa “Hanao velirano isika fa hiezaka mafy, hiasa hatrany, ary hametraka ho laharam-pahamehana ny fametrahana ny Fanjakana tsara tantana sy Tan-dalàna. Hatomboka amin’ny ady amin’ny kolikoly, ady amin’ny halatra andramena sy ireo fanondranana tsy ara-dalàna ireo zavaboary sy harena an-kibon’ny tany ary ny ady amin’ny halatra taolam-paty izany. Indray mihira isika, hoy ny lehiben’ny governemanta ka tokony hampitovy  feo amin’ny fanatanterahana ny tetika hampandrosoana ny firenena sy ahafahana mametraka lamin’asa isam-paritra izay mety hahazoana fanampiana ara-bola avy any ivelany. Tsara ny tsy miankin-doha amin’ny hafa saingy noho ny krizy dia tsy maintsy mbola miara-miasa amin’ny vahiny aloha i Madagasikara. Hatreto aloha dia mijanona ho fandaharanasa anaty boky fotsiny ny PND fa tsy mbola nisy ny sorabola mazava azo avy amin’ireo mpiara-miombon’antoka. Ny masoivoho Frantsay eto amintsika aza dia efa nisy fotoana nanakiana mafy io fandaharanasan’ny fitondram-panjakana ankehitriny io. Tsy tonga nanatrika ity lanonam-panokafana ny atrikasa momba ny PND ity teny amin’ny CCI Ivato ny masoivohon’i Frantsa sy Etazonia izay anisan’ireo firenen-dehibe manana ny maha izy azy tena miara-miasa akaiky amin’i Madagasikara. Mampieritreritra !

 Andry Ratovo/RTT

Tia Tanindrazana

Samia mijoro ho an'i Gasikara.