Politique

Opération Mandio Nandaitra sy nampihena ny halatra omby, hoy ny Mada omby

Politique
Alakamisy 18 Oktobra 2018

Ela no tsy heno nitaraina intsony momba ny herisetra mpahazo ny tontonlon’ny fandraharahana omby ry zareo avy eo anivon’ny Mada omby, anisan’ny koperativa lehibe indrindra misehatra eo amin’io tontolo io.

Araka ny nambaran’ny filohan’izy ireo, Tahiry Sambehafa, nahomby sy nandaitra ny hetsiky ry zareo avy eo anivon’ny zandarimariam-pirenena na ny Opération Mandio raha ny hita tato anatin’ny 3 volana. Manatanteraka iraka isa-kerinandro any amin’ireo faritra misy ny koperativanay aho, hoy ny tenany fa hitako ho nisy fihenany teo amin’ny 30% teo avokoa ny halatra omby raha ny hitako ao Tsiroanomandidy sy Maintirano fotsiny. Mety ho antony mampihena izany koa ny fampielezan-kevitra saingy iny moa resaka politika ka tsy hidiranay loatra. Manodidina ny 1.800.000 isa eo moa ireo omby sahanin’ny Mada omby, raha ny nambarany, ary mitsinjara ao Maintirano, Ambatomainty, Antsalova, Morafenobe, Ihosy ary Miandrivazo.

J. Mirija