Politique

Olom-pirenena mitovy fomba fijery Tsy mahavaha olana ny mpanao politika

Politique
Talata 22 Mey 2018

Nivondrona ho iray ireo olom-pirenena mitovy fomba fijery eto amin’ny firenena. Anisan’ireny i Ndranto Razakamanarina avy ao amin’ny Alliance Voahary Gasy, Fanirisoa Ernaivo filohan’ny sendikan’ny mpitsara, Mamitiana Razafimandimby filoha tale jeneralin’ny Scoop digital, Françis Razafiharison na i Françis Turbo mpanao hatsikana sady mpanentana ary Rado Rabarilala, mpikambana ao anatin’ny sendikan’ny mpiasan’ny Air Mad.

Hanambatra ny heriny izy ireo manomboka izao entina hanavotana ny firenena. Raha araka ny nambaran’izy dimy mianadahy ireto mantsy dia tsy mahavaha olana ny mpanao politika Malagasy. Miverina hatrany ny krizy, hoy izy ireo, tsy omena ny hasiny ny mpanelanelana, mihamahazo vahana ny kolikoly sy ny tsy fandriampahalemana ary ny fangoronan-karena amin’ny tsy rariny izay miteraka fahantrana mangitsokitsoka eo amin’ny fiainan’ny maro an’isa. Hanambatra ny paikadiny avy ny tsirairay izay marihina fa olona samy manana ny maha izy azy avokoa sady efa mahalala tsara ny olana mianjady eto amin’ny firenena. Mahatoky izy ireo fa ho vitany ny hanafaka an’i Madagasikara, fanampiana tsy ilana fitadiavan-tseza na tambiny fa mba ho tombontsoan’ny besinimaro. Tsiahivina moa fa tsy eken’izy ireo ny fizaran-tseza ketrehin’ireo mpanao politika amin’izao satria lalana tsy ahitam-bahaolana, hono.

Pati