Politique

Mponin’ny faritra iva eny Ampefiloha Nirary soa ny kandida Marc Ravalomanana

Politique
Alatsinainy 17 Desambra 2018

Ny zoma teo no nanatanteraka hetsika ho fanamarihana ny tsingerintaona nahaterahan’ny kandida ho filoham-pirenena, laharana faha-25, Marc Ravalomanana ny mponina tetsy amin’ny faritra iva Ampefiloha.

Nanao hetsika manokana ho fanehoana izany izy ireo. Nalahatr’izy ireo tamin’ny arabe ny yaourt marobe vokarin’ny orinasa Tiko ary nanaovan’izy ireo soratra manambara hoe : « arahabaina ianao ry ingahy Ravalomanana fa nahatratra ny faha 69 taonanao ». Na dia efa tamin’ny alarobia 12 desambra lasa teo aza no daty nahaterahan’ity filoham-pirenena teo aloha ity dia tsy misy firariantsoa tara izany, hoy ny fanazavana. Taorian’io hetsika io dia niaraka nirohotra nanao filaharambe nanerana ny tanànan’Ampefiloha izy ireo. Ny ankamaroan’ireo mpanaradia ny kandida laharana faha-25 aza moa dia ny sabotsy izay nahavorian’ny kandida Marc Ravalomanana vahoaka marobe nandritry ny faradoboka natao tetsy Mahamasina no nanararaotra niarahaba azy.

J. Mirija