Politique

Mpitondra sy kandida 26 Manao moana sy marenina

Politique
Sabotsy 27 Oktobra 2018

An-daniny, mamerimberina fa fikasana hanemotra fifidianana no anton’ny fitakian’ireo kandida ho filoham-pirenena miisa 26 hanokatra ny lisi-pifidianana amin’izao andro vitsy tsy hahatongavan’ny 7 novambra izao.

An-kilany, ireo kandida dia nanamafy hatrany ary mbola nanamafy omaly fa tsy olana ny datin’ny 7 novambra raha hanatontosana ny fifidianana fa mila iverenana sokafana haingana fotsiny aloha ireo lisitra izay efa hita fa feno hosoka toy ny anarana verin-droa marobe. Eo koa ny fisian’ireo biraom-pifidianana nofinofy, izany hoe tsy misy akory fa lazaina ho misy. Dia samy manao moana sy marenina eo ireo mpitondra sy kandida 26. Azo antoka 90% fa antso an’efitra no hotontosain’ireto kandida ireto izay nanomboka ny dingana fanaterana isaky ny andrim-panjakana ity fangatahan’izy ireo ity nanomboka omaly satria dia nazava koa ny tenin’ny praiminisitra ny alarobia teo fa tsy hisy fiantraikany amin’ny fifidianana mihitsy ny hetsik’izy 26 mianadahy ireto.

J. Mirija