Politique

Partagé sur :
• facebook

Nihaona tamin’ny masoivohon’i Afrika atsimo eto amintsika teny Faravohitra Atoa Gert Grobler indray omaly maraina ny filoha teo aloha Marc Ravalomanana. Naharitra adiny iray sy sasany ny fihaonan’ny roa tonta, izay nifantoka tamin’ny toe-draharaham-pirenena ka niresahana ny krizy eo amin’ny andrim-panjakana sy ny vahaolana mahakasika izay, ny momba ny fahamarinan-toeran’ny firenena izay efa tena latsaka an-katerena tokoa ankehitriny.

Manana ny maha izy azy

Nanatrika ity fihaonana ity ihany koa i Donat Andriamahefamparany sekretera jeneralin’ny antoko Tiako I Madagasikara sy Tojo Ravalomanana. Miteraka adihevitra etsy sy eroa moa ity hoe masoivohona firenena vahiny na fikambanana iraisam-pirenena tonga eny Faravohitra mihaona amin’i Marc Ravalomanana isan-kerinandro, ary efa ho isan’andro mihitsy aza satria tena tsy mbola fahita hatramin’izay.Ao ireo milaza fa dia efa nifindra eny Faravohitra mihitsy izany ny lapam-panjakana sy ny ministeran’ny raharaham-bahiny ary tena any amin’i Dada ny lakile matoa tonga mihaona aminy eny ireo masoivohon’ny firenena ngeza sy matanjaka indrindra eto an-tany tahaka an’i Etazonia, Frantsa, Grande Bretagne, Afrika Atsimo, efa tonga teny ihany koa ny solontenan’ny vondrona Afrikanina sy ny vondrona eoropeanina eto amintsika. Toa manaporofo izany rehetra izany fa anisan’ny mpandray anjara politika tsy azo ihodivirana eto Madagasikara Atoa Ravalomanana ary tena ilain’ny rehetra ny heviny ny amin’ny fomba hamahana ny krizy maro samihafa misy eto amntsika amin’izao fotoana.Tsara homarihana fa efa nisy ihany koa ireo solombavambahoaka, tsy TIM ihany fa avy amin’ny ankolafin-kery politika hafa efa nihaona tamin’ity filoha teo aloha ity ary vao atsy ela koa izay no nahafantarana fa efa nisy ny fifampiresahana teo amin’i Marc Ravalomanana sy Jean Max Rakotomamonjy filohan’ny antenimieram-pirenena. Na ahoana na ahoana adihevitra atao dia mazava ny resaka fa tena ifandrombahana ny mihaona sy maka hevitra amin’i Marc Ravalomanana ary samy manaiky ny rehetra fa olobe manana ny maha izy azy eto an-toerana sy eo amin’ny sehatra iraisam-pirenena i Dada ary tena mbola mila azy i Madagasikara.

RTT

Tia Tanindrazana

Samia mijoro ho an'i Gasikara.