Politique

Partagé sur :
• facebook

Dia sanatria ho matimaty foana tokoa ve ny kapiteny Falihery Andriantiana fa dia ho afaka madiodio ny namono azy ? Dia ho marina tokoa ve amin’ity fanjakana entin’ny Filoham-pirenena Hery Rajaonarimampianina ity fa tsy maty manota tokoa izay akaiky azy ?

Raha  ny taratasy  fanomezan-dalana avy amin’ny minisitry ny  zandary  ho an’ny lehiben’ny fampanoavana  ao amin’ny fitsaran’i Betroka tokoa  mantsy  no nandrasana mba ahafahana  miroso amin’ny fanadihadiana  izay niray tsikombakomba  tamin’ny namonoana ny kapiteny  Falihery dia famindran-toerana  indray no tonga. Zandary 10 no indray hafindra toerana  ao amin’ny kaompanian’i Betroka ka  anisan’ireo  mandeha  ny zandary roa ilain’ny fitsarana  ao Betroka. Ny Malagasy  moa dia mora andairan’ny tsaho izay ihany ka tsy  fantatra intsony ny tena  marina. Malaza any  Betroka fa  misy manampahefana  manararaotra ny  maha akaiky ny Filoham-pirenena  ny tenany  ka manao  izay tiany  atao amin’ny mpiasam-panjakana any an-toerana. Raha nanontaniana mikasika  ity  fanadihadiana  momba ny  namonoana ny  kapiteny  Falihery  ity kosa ny  avy ao amin’ny toby Ratsimandrava dia  nanamafy fa  efa madiva ho vita ny  fanadihadiana nataon’ny  mpitandro ny filaminana fa ny  taratasy  fanomezan-dalana avy amin’ny   minisitry ny  zandary no sisa  andrasana. Hatramin’ny  fotoana nanoratana  moa dia  tsy mbola  nivoaka  izany. Nanamafy kosa  ny avy ao amin’ny toby Ratsimandrava  fa tsy maintsy   mitohy ny  fanadihadiana  na dia  misy aza ny zandary afindra  toerana. Rehefa  ilain’ny fitsarana izy ireo  dia tsy maintsy  tonga,  hoy ny  fanazavana azonay.

Tia Tanindrazana

Samia mijoro ho an'i Gasikara.