Politique

Jean Omer Beriziky Nendahina avokoa ny sariny

Politique
Talata 04 Septambra 2018

“Tsy ananan-kavana ny fampiharana ny lalàna” ary “ny zanaka tiana tsy itsisiana rotsa-kazo”.

Niharan’io ny praiminisitra tamin’ny tetezamita iraisana sady kandida amin’ny fifidianana filoham-pirenena ho avy, Jean Omer Beriziky. Zanak’i Sambava izy, avy any amin’ny kaominina Tanambao Daoud. Toerana maro talaky maso tao Sambava no nahitana afisy misy sariny. Nendahin’ny tompon’andraikitra tao an-toerana avokoa izy ireny fa mipetaka amin’ny toerana tsy azo ametahana afisy. “Mihatra amin’ny kandida hafa ve ny fepetra toy itony sa misy fitanilàna ? ”, hoy ny fanamarihan’ny mponina manoloana izao fanadiovana izao. Hatreto, tsy mbola voafaritra ny toerana voatokana tokony hametrahana ny afisin’ny kandida filoham-pirenena, izay miisa 36 amin’ity indray mitoraka ity, hany ka samy mametaka ny azy amin’izay mahadiavolana ny sainy ny rehetra, manararaotra ny gaboraraka !

Jean D.