Politique

Partagé sur :
• facebook

Mibaribary toy ny tafika andrefan-tanàna ankehitriny ny tsy fananan’ny antoko Hery Vaovao ho an’i Madagasikara (HVM) fototra ka io mampitsingilahila ny fitondran’i Hery Rajaonarimampianina io.

Miantehitra amin’ireo solombavambahoaka voafidy tamin’ny lisitra tsy miankina ny HVM nangonina handrafitra ny vondrona parlemanterany eny amin’ny Antenimieram-pirenena, nefa nivadihan’ny mpikambana amin’ny fotoana nilany azy. Nanaitra, ohatra, fa ny mpitarika ity vondrona parlemantera ity mihitsy, ny depiote Razafindrafito Lova Narivelo, voafidy tany Ifanadiana, no nandresy lahatra ireo solombavambahoaka namany handany ilay fangatahana famerezan-jo ny filohan’ny Repoblika tao amin’ny lapan’ny Antenimieram-pirenena ny alin’ny talata 26 mey 2015 teo. Nisy ny valandresaka nataon’ireo solombavambahoaka manohitra ny hanonganana ny filohan’ny Repoblika tao amin’ny Colbert Antaninarenina omaly antoandro fa tsy tazana izy. Niakatra  tao amin’ny televiziona nasionaly TVM indray ny hariva, fa tsy niaraka tamin’ireo namany ihany koa. Tsy izy irery fa misy depiote HVM hafa. Inona no mety ho anton’izany fivadihana izany ? Ao no milaza fa fanehoam-pahatezerana vokatry ny fanilihana azy ireo tamin’ny fisafidianana ireo ho kandidan’ny HVM amin’ny fifidianana kaominaly hatao amin’ny 31 jolay 2015 izao fihetsika izao. Loharanom-baovao hafa indray no milaza fa tetika efa nomanina mihitsy io hahatongavana amin’ny fandravana ny governemanta mba hirosoana amin’ny fananganana antenimierampanorenana na «Assemblée Constituante» araka ny tapaky ny mpizaika momba ny fampihavanam-pirenena teny amin’ny CCI Ivato. Na itsy voalohany anefa na ity faharoa, dia samy endriky ny fifamitahana avokoa ary mahasarotra ny fifehezana ny solombavambahoaka tsy avy amin’ny antoko politika ao Tsimbazaza.

Jean D.

Tia Tanindrazana

Samia mijoro ho an'i Gasikara.