Politique

Hery Rajaonarimampianina Nirary ny soa sy ny tsara ho an`ny firenena

Politique
Sabotsy 19 Janoary 2019

Taorian`ny fifandimbiasam-pahefana teny amin'ny lapam-panjakana Iavoloha omaly dia nitafa fohy tamin`ny mpanao gazety ny filoham-pirenena, Hery Rajaonarimampianina.

Ilaina ny fifandimbiasam-pahefana mba hisian'ny fitoniana sy ny fampandrosoana. Araka ny voalazan`ny lalàna sy ny lalàmpanorenana dia manan-tantara eto amin`ny firenena ny fifamindram-pahefana tahaka ireny satria voalohany no nisian`izany teo amin`ny filoha roa tonta, hoy izy. Heveriny fa taratry ny fifandimbiasam-pahefana amin’ny fomba demokratika sy ny fanajana ny soatoavina repoblikanina izany. Ho taratry ny fandrosoan`ny demokrasia eto Madagasikara, ihany koa satria mbola malemy izany ka mila hamafisina isan`andro, amin`ny isam-batan-olona, indrindra ny mpitondra isaky ny ambaratongany, hoy ity filoha teo aloha ity. Nirary ny soa sy ny tsara ho an`ny firenena ny filoha Rajaonarimampianina ary enga anie izay rehetra vita sy natao hotohizina sy hohamafisina hitondra fisandratana ho an`ny firenena, hoy hatrany ny fanambarany.

Marigny A.