Politique

Partagé sur :
• facebook

Nivoaka ny talata 22 septambra teo ihany ny voka-pifidianana kaominaly tany amin’ny Faritanin’i Toliara izay nambara fa vokatra tsy azo hivalozana, hoy ny solombavambahoaka Helson Brisson Erafa na Jubé filoha lefitry ny Antenimieram-pirenena faritany Toliara.

 Nampametra-panontaniana anay ihany, hoy izy ny hoe : nahoana no tsy niara-navoaka tamin’ny an’ny Faritany hafa ny zoma 18 septambra teo izany ? Tsy nahafa-po azy ny vokatra tany an-toerana. Nisy mantsy, hoy izy, ny « requête » nalefa tany amin’ny fitsarana toa tsy nojerena akory. Ohatra tamin’izany izay natao tany Andranovory. Mbola manana folo andro anefa izy hampakarana ny raharaha any amin’ny filankevi-panjakana. Marihina fa efa maro ireo kandidà nifaninana no efa niatrika itony fifidianana itony taloha ka tsy sarotra ho azy ireo ny nampiasa ny traikefa nananany avy teo amin’ny fangalaram-bato. Nambarany fa tany amin’ny biraom-pandatsaham-bato samihafa dia nahitana kandidà Mts, Mapar, Tim nanana porofo samy nangala-bato avokoa.

Raha ny mikasika ilay raharaha depiote Mara Niarisy avy any Ankazoabo Atsimo dia nambarany fa tsy nety ny fanaovana fisavana ny trano fonenan’ity namana ity fa tsy nisy akory fahazoan-dalana nalain’ny mpitandro ny filaminana taty amin’ny birao maharitry ny Antenimieram-pirenena nahazoan’izy ireo nanatanteraka izany araka ny lalàna. Efa nandefa antso any amin’ireo minisi-panjakana tompon’andraikitry ny fandriampahalemana eto amintsika moa ny filohan’ny Antenimieram-pirenena ny alatsinainy teo ka inoana fa ho avy hitondra fanazavana ety amin’ny birao maharitra farafahatarany ny zoma izao izy ireo. Ao ny minisitry ny fiarovam-pirenena, ny avy amin’ny zandarimariam-pirenena sy ny avy amin’ny polisim-pirenena koa fa dia miandry izahay ety Tsimbazaza ny amin’io.

Ntsoavina Evariste

Tia Tanindrazana

Samia mijoro ho an'i Gasikara.