Politique

Partagé sur :
• facebook

Nahoraka indray omaly fa misy mikasa hanondrana andramena any Mananara avaratra any, ka asa izay ho ambaran’ny fanjakana sa hilaza indray ve fa tsaho izany ?Tsy manara-dalàna ary notsipahan’ny HCC ilay volavolan-dalàna momba ny vondrom-bahoaka itsinjaram-pahefana ahitana ny sata monakana momba an’Antananarivo renivohitra,Nosy Be sy Nosy Sainte Marie,

fandanian’andro sy fotoana fotsiny izany no natao nandritra ny 3 volana ary mbola mety hitohy aza ny fifandonan-kevitra momba azy ity.Miroborobo ny fakana an-keriny ary efa misy ny mpitandro filaminana nivadika ho jiolahy, niverina ho mahery vaika indray ny asan-dahalo any atsimo ; zary efa mahazatra ny mandre fa misy volamena na zavatra hafa saika naondrana an-tsokosoko indray teny Ivato.Na ny fifidianana izay ho filohan’ny komity olimpika malagasy tany Toliara aza dia nivadika ho savorovoro.

Politika no betsaka, asa tsy misy

Etsy ankilan’izay manangam-bovona ny praiminisitra ka mampitandrina isaky ny mikabary fa hoe ho foanana hono ny kolikoly ary tokony hiasa tsara amin’izay ny mpiasam-panjakana anaty birao; tsy re feo ao anatin’izany rehetra izany ny filoham-pirenena.Re siosion-dresaka fa miady saina mafy mba hahitana vola i Hery Rajaonarimampianina satria tena efa manify ny eo am-pelatanana, dia mifanesisesy tokoa ny fanaovan-tsonia ny fifanaraham-piaraha-miasa amin’ny fanjakana malagasy sy ireo mpiara-miombon’antoka, saingy fanomezan-toky aloha no re hatreto fa tsy hita maso izay vola mitobaka.Tsapa avy amin’ireo zava-miseho rehetra ireo fa mikorontana ny firenena ary tsy mbola tena tafapetraka tsara ilay fahefam-panjakana hany ka an-kitsapatsapa no atao.Herintaona izany izao dia tsy nisy mihitsy zavatra nataon’ny fitondram-panjakana mba hanalefahana ny fahasahiran’ny vahoaka, fandrafetana paikady politika mba hanamafisana orina ny seza sy ny fahefana no hita fa raha izay asa mivaingana ho fitsinjovana ny vahoaka aloha dia :   « zero ».Mazava ho azy fa mbola tsy mahatoky izao fitondrana Rajaonarimampianina izao mihitsy ny mpamatsy vola sy ireo mpiara-miombon’antoka satria be loatra ny zavatra manjavozavo sy tsy milamina , diplaomaty aza moa misy maka an-keriny ankehitriny.Raha izao no mitohy dia ho sahirana hiatrika ny fifidianana ben’ny tanàna ny antokon’ny fitondrana satria efa manomboka sosotra amin’ilay tsy fahaiza-mitantana ny olona; ary ny tena atahorana dia ny fihitaran’ny fahantrana izay tsy maintsy hitarika fipoahana ara-tsosialy goavana eto.

SARY:Hery R sy PM Ravelonarivo

RTT

Tia Tanindrazana

Samia mijoro ho an'i Gasikara.