Politique

Firenena Alemana Manara-maso akaiky ny fifidianana

Politique
Sabotsy 03 Novambra 2018

Anisan’ireo firenena manohana ara-bola ny fanatanterahana ny fifidianana eto Madagasikara i Alemaina ka nanolotra vola ao anatin`ny kitapom-bolan`ny SACEM izay mitentina 341 000 USD entina hanapiana ity CENI Madagascar ity hikarakarana fifidianana eto Madagasikara.

Tsiahivina fa ny volana septambra farany teo dia efa nisy ny vola fanampiana tany amin`ity firenena ity nitentina 585 000 USD teo aloha. Araka izany, vola mitentina 926 000 USD ny fanampiana nentina ho an`ny CENI hanampiana ihany koa ny fahabangana ao anatin`ny kitapobolan`ny SACEM. Efa feno kosa ny fepetra hafahan`I Madagasikara miatrika an-kalalana ny fifidianana amin`ity taona ity raha ny nambaran`ny masoivohon`ny Alemaina, Sem Harad Gehrig. Noahamafisiny fa tsy misy intsony lisi-pifidianana tonga lafatra ampiasaina amin`izay fifidianana izany ka tsy tokony atao sakana velively izany. Ny fifidianana irery ihany koa hoy hatrany ny masoivohon`ny firenena Alemaina no fomba iray hanehoan`ny vahoaka Malagasy ny safidiny sy ny heviny ka ny vahoaka ihany no tompon`ny fahefana. Dingana maro no vitan`ny CENI amin`ny mba halavorary izany fifidianana izany toy ny fametrahana ireo biraom-pifidianana maherin`ny 24 000 manerana ny nosy. Antenaina fa fifidianana madio sy mangarahara ary eken’ny rehetra no hisy ka na ny mandresy na ireo resy dia samy hanaiky izay vokatra mivoaka eo.

Marigny A.