Politique

Fiatrehana fifidianana “Kikina” ny kandidà sasany

Politique
Zoma 28 Septambra 2018

Tsy tafiditra ao anatin’ ny fampielezan-kevitra dia efa misy sahady ireo kandidà milaza fa efa tena lany vola.

Nirobaroba mialoha ny fotoana, hany ka manao izay ho afany mitady mpamatsy vola etsy sy eroa. Araka ny voalazan’ny lalàmpanorenana, nanana dimy taona izy ireo nanomanana fifidianana, indrindra eo amin’ ny lafiny ara-bola. Tsy mora tokoa ny miatrika fifidianana ka mametra-panontaniana ny fahamatoran’ireo milaza hisedra safidim-bahoaka. Amin`ny ankapobeny, ny Malagasy dia tia olona mahery ary matetika mitodika any amin’ny olona manam-bola ny safidiny. Rehefa hitany fa mareforefo ilay olona dia tsy mitodika any loatra. Raha zohina, tsy niomana ireo kandidà sasany fa zava-dehibe fotsiny ny ho hitam-bahoaka hoe hirotsaka hofidiana. Ny an’ny hafa aza nijanona teo amin’ny fanangonana ireo antontan-taratasy ilaina sy anto-bola na “caution” narotsaka fotsiny dia tapitra ny serasera. Izany ve no ho Filoham-pirenena ? Ahoana ny fomba hanakinana amin’izy ireo ny fitantanana ny firerena mandritra ny dimy taona manaraka ? Tsy horobarobain’izy ireo ve ny volam-panjakana ? Midika aloha izany fa tsy fahamatorana mihitsy.

Marigny A.