Politique

Partagé sur :
• facebook

Nolavin’ny fitsarana avo momba ny lalàmpanorenana na ny HCC ny zoma alina teo ny fitakian’ny Solombavambahoaka ny amin’ny fampiatoana ny Filoham-pirenena amin’ny asany sy ny famerezan-jo politika azy.

Nomarihin’ny  HCC kosa fa  azo noraisina  tsara ilay  fitoriana saingy ny  votoatiny no maivana ka nandavana ny  fitakian’ny  Solombavambahoaka. Mba  ho fiarovana ny  fiandrianam-pirenena  sy  ho fiarovana ny fitoniana politika manoloana izao krizy  eo anivon’ny andrim-panjakana izao anefa dia namoaka didy ny HCC ny  tsy maintsy hiarahan’ny andrim-panjakana rehetra sy ny hery politika samihafa  miara-miasa ho fanavotana ny  firenena ao amin’ny andininy faha-5 amin’ny fanapahan-kevitra noraisiny.  

Misy mitady hanakorontana

Misy  mitady hanakorontana  sahady ilay  fanapahan-kevitra  navoakan’ny  Fitsarana avo momba ny  lalàmpanorenana na HCC mahakasika  ny andininy fahadimy izany  mitaky ny fiaraha-miasan’ny andrim-panjakana sy ny  hery politika samihafa ao anatin’ny fanajana ny lalàmpanorenana ho fitsinjovana ny tombontsoa ambonin’ny firenena izany. Raha ny fandikan’ny mpanao politika ny tian’ny HCC amin’ny fomba tsotra amin’ity andiny faha dimy amin’ny didy navoakany ny zoma alina teo ity izany dia mitaky fiaraha-miasa  sy fananganana  governemanta vaovao  sy  fanitsiana eny anivon’ny birao maharitry ny Antenimieram-pirenena no tiana ahatongavana. Nifanarakaraka  tamin’io didy navoakan’ny HCC io  dia nisy   taratasy  nivoaka izay nisy ny tombokasen’ny Fiadidiana ny  Repobilika izay toa  mitady hizara sahady ny fanjakana sy ny  isan’ny toerana ho azon’ny antoko matanjaka ao anatin’ny  governemanta vaovao. Any anatin’ny  tambajotra  sosialy ihany koa anefa no  nahitana ny sabotsy tolakandro fa nolavin’ny Fiadidiana ny Repobilika ny fisian’io taratasy noezahina naparitaka io ary nambara fa olona misandoka no nanao azy.

Tsy hifanongana intsony ?

Ambaran’ny Hcc ihany koa tamin’ny fanapahan-kevitra fa miara-miasa ireo andrim-panjakana rehetra misy ary manambara an-kolaka izany fa tsy  misy afaka mifanongana intsony fa ny fanontaniana mipetraka dia ny hoe mety hisy tokoa ve izany ny  fifampizarana seza ka ho afaka hiara-miasa  avokoa tokoa ve ireo hery politika samihafa na dia tsy ho ankasitrahan’ny Filoham-pirenena izany ? Ny  fanontaniana iray lehibe ihany koa dia ny hoe mety hanao ahoana no fandraisan’ny vahoaka ity fandaminana zary didy navoakan’ny  HCC ity  mba hampiarahana ny tsy mitovy fijery politika ?

Légende :Nanapa-kevitra an-kalalahana tokoa ve ireo mpitsara ao amin’ny HCC ?

Andry Ratovo 

Tia Tanindrazana

Samia mijoro ho an'i Gasikara.