Politique

Fanamarinana ny anarana anaty lisi-pifidianana Mavitrika ny olona amin’ny ankapobeny

Politique
Zoma 25 Mey 2018

Efa naverin’ny komitim-pirenena misahana ny fifidianana ( CENI) eny anivon’ny fokontany tsirairay avy indray amin’izao fotoana ny lisi-pifidianana hahafahan’ireo mponina tsy voasoratra anarana mampiditra ny anarany.

Ho an’ny fokontany Anosimasina Itaosy, kaominina Bemasoandro manokana dia efa tafakatra an-jatony ireo olona tsy tafiditra ao anatin’io lisi-pifidianana vaovao io, hoy Rasoaniaina Zoeline, sefom-pokontany ao an-toerana. Lohalaharana ireo tanora vao feno 18 taona nanomboka ny fiandohan’ny volana febroary no ho mankaty. Tena mavitrika tokoa ireo mponina avy amin’ny faritra dimy ao aminy mijery sy manamarina ny anarany ao anaty lisi-pifidianana. Folo isan’andro izy ireo ho an’ity fokontany iray ity ka misy mihitsy ireo mitabataba, indrindra fa ireo tsy mahita ny anarany. Tsiahivina fa mivoha hatrany ny fokontany mandray ireo mpifidy ao aminy tsy voasoratra anarana. Ny dika mitovy amin’ny kara-panondron’izy ireny no takian’ny fokontany hahafahany mamerina izany any amin’ny CENI indray. Tsiahivina fa miisa 23.358 ireo mponina ao amin’ny fokontany Anosimasina amin’izao raha 8.770 kosa ireo mpifidy feno taona.

Pati