Politique

Partagé sur :
• facebook

Tena ilain’ny mponina amin’ny firenena isanisany ny fananana ireo lalàna marobe mandrafitra ny fiarahamonina. Voalohany amin’izany ny Lalàmpanorenana izay andry iray lehibe iorenan’ny firenena tahaka an’i Madagasikara. Ao koa ireo lalàna isan-karazany natao hifehy ireo rafitra na fikambanana sy ny mpiara-belona amin’ny ankapobeny.

 Azo ambara fa mampiavaka an’i Madagasikara anefa ny tsy fananana hatramin’ny niverenan’ny fahaleovantenany ireo lalàna tena mifototra sy miainga amin’ny tena fisainana Malagasy. Nanjaka sy nisongadina hatrany ny fakan-tahaka be fahatany ireo lalàna vahiny avy amin’ilay firenena nanjanaka antsika fahizay. Hita hatramin’izao io trangan-javatra io manomboka any amin’ny Lalàna Fototra Malagasy ka hatrany amin’ireo lalàna mifehy ireo sehatra maro eto amin’ny firenena. Manahirana ny sain’ny besinimaro koa ny fanomezan-danja be loatra ny fiteny frantsay amin’ny fandrafetana azy ireo manoloana ny fitenin-drazantsika. Tsy misaraka amin’ny lalàna velona ihany koa ny fampiharana sazy ho an’ireo izay minia na tratra mandika izany saingy toa rano natondraka avy ao an-damosin’ny gana daholo hatreto ny ezaka rehetra izay natao. Azo sokajiana ho tsy mpanaja lalàna isika malagasy, indrindra ireo solontenam-bahoaka manampahefana eto Madagasikara izay noeritreretina ho modely fakan-tahaka. Tsy mahagaga noho ireo antony ireo raha tsy mandroso ny vahoaka Malagasy satria fanoitra iray mitondra mankany amin’ny fandrosoana ny fanajana ireo lalàna velona.

Tia Tanindrazana

Samia mijoro ho an'i Gasikara.