Politique

Fampihavanam-pirenena Hiseho anio izay olonkendry !

Politique
Talata 28 Aprily 2015

Tonga ny fotoana ! Hotontosaina manomboka anio ary haharitra hatramin�ny 02 mey ny dinika nasionaly momba ny fampihavanam-pirenena karakarain�ny FFKM.

Tsy hanatrika izany ny filoham-pirenena teo aloha Zafy Albert. Tonga eto an-toerana hatry ny omaly, ihany koa i Andry Nirina Rajoelina, filohan’ny Tetezamita fa tsy handray anjara. Ho an’ny filoha teo aloha Marc Ravalomanana indray dia efa nanamafy an-tsoratra tamin’ny FFKM fa tsy izy velively no sakana amin’ny fampihavanam-pirenena. Mbola nentiny am-bavaka aza ny hahatontosan’izany soa aman-tsara omaly, teny an-tranony eny Faravohitra. Ny amiraly Didier Ratsiraka moa, taorian’ny vavaka iraisam-pinoana tetsy amin’ny EKAR Mahamasina tamin’ny 29 martsa 2015, nialoha ny nihazoany an’i Frantsa hanao fizaham-pahasalamana dia nanamafy ny fandraisany anjara amin’ny dinika fampihavanam-pirenena ary maniry ny hisokafan’izany amin’ny herivelona rehetra. Ho an’ny Solombavambahoakan’i Madagasikara voafidy tany Morondava, Hawel Mamod’Ali, mpitondra tenin’ny Mapar dia ny mpitondra fivavahana izay mitarika ity fampihavanana ity aloha no tokony hifanara-kevitra voalohany vao mitarika ny hafa. Tsy mbola misy antony hirosoana amin’ny fampihavanana ny any amin’y faritra, hoy ny Depiote Hawel raha ny aty an-dohany izay tena fototry ny olana aza tsy mifanaraka. Ankoatra ny fitakian’ny ankolafy Rajoelina ny fampiharana ny andininy faha -54 amin’ny lalàmpanorenana mahakasika ny fanendrena ny praiminisitra dia tsy ankasitrahan’izy ireo ihany koa ny fampandoavana vola ny olona izay te handray anjara amin’io fampihavanam-pirenena io. Ho an’ny minisitry ny Asa sy ny Lalàna Sosialy teo aloha Tabera Randriamanantsoa indray, izay mpitondra tenin’ny Ankolafy Zafy Albert, dia ny fandravana ny Ffm hatrany no takian’izy ireo. Tsy mety, hoy ity minisitra teo aloha ity raha misy fifanitsahan’andraikitra amin’ny fanatontosana ny fampihavanam-pirenena fa tokony hapetraka izay iray ara-dalàna dia ny CNR izany ka izay vitany eo no ekena. Mivadibadi-kevitra ny Filoha ankehitriny ka aleo izay tena ara-dalàna no atao ka tsy misy hialana intsony izay tapaka eo avy eo. Ho mariky ny fandraisana anjara amin’ny fampihavanam-pirenena dia nampatsiahiviny fa efa natolotry ny Profesora Zafy Albert ny Ffkm ny drafitra ahitana fanontaniana miisa 33 sy ny lalan-kizorana amin’ny fampihavanam-pirenena ka anjarany indray ny mampiasa azy.