Politique

Partagé sur :
• facebook

Manomboka ny fotoana hahafahan’ny filoha vaovao Andry Rajoelina manatanteraka ny fampanofinofisana nakana ny fom-bahoaka.

 Ny Malagasy rahateo efa tena sahirana fa tsy mahandry 5 taona izany intsony. Tena mila fampandrosoana miantraika amin’ny fiainany andavanandro rahateo, ankoatra ilay politikan’ny kibo noresahin’ity filoha vaovao ity tetsy Mahamasina ny sabotsy teo. Maro ny olana sedrain’ny olona amin’izao, toy ny fidangan’ny vidim-piainana. Vahaolana maharitra no ilain’ny vahoaka fa tsy ny fizarana vary mora ho an’ny ampahan’olona eto amin’ny firenena. Efa nambarany ny hampitomboana ny velaran-tany hamokarana izay tena tsara tokoa. Tany amin’ny faritra Alaotra Mangoro moa i Andry Rajoelina tamin’ny fampielezan-kevitra dia nilaza mihitsy fa hizara tany 10ha avy ho an’ny tanora tsy an’asa. Ho tanteraka tokoa ve ?  Tsy misy ratsy ireo vina ka miandry ny isam-batan’olona satria fatra-panenjika fatratra ny fanjakana teo alohany raha ny mpiara-dia amin’i Andry Rajoelina. Sao mantsy hatao fomba fiteny sy firesaka indray atsy ho atsy ny hoe: tsy mora ny manao zavatra, ary mahandrasa dimy taona. Anisan’ireny ny fanaovana eson-teny tamin’i Hery Rajaonarimampianina tamin’ny tsy fahatontosana ilay “telo volana monja dia voavahako ny delestazy”. Nametraka tokoa ity farany taty amin’ny fiafaran’ny taom-piasany ny fahavitan’ny tetikasa famokarana herinaratra amin’ny riandrano ary misy amin’ny tetikasa no eo am-panombohana, izay ny fanjakana Rajoelina no hisitraka azy. Ho hita eo ny hafitsony izay nilokaloka fa hampitomboany avo roa heny ny famokarana herinaratra eto ary ho amin’ny vidiny zakan’ny rehetra. Mila vahaolana maika ny vahoaka eo anatrehan’ny  fidangan’ny faktiora, ny sondro-bidin’ny solika saika isam-bolana, ny fitotongan’ny sandam-bola ariary izay tsy azo andrasana dimy taona. Ny voka-dratsin’ny loza voajanahary ihany koa io tena mila ny tolo-tanana sy vahaolana mafonja avy amin’ny fanjakana.

Toky R

Tia Tanindrazana

Samia mijoro ho an'i Gasikara.