Politique

Ekipan-dRavalomanana sy Rajoelina Samy nolazaina ho nitory tsy nisy porofo

Politique
Alarobia 09 Janoary 2019

Toy ny tamin’ny fihodinana voalohany ihany dia nolavina avokoa ny fitoriana mikasika ny tsy fahadiovan’ny fifidianana izay ho filoham-pirenena fihodinana faharoa natao ny 19 desambra 2018 teo.

Nahavatra naka ohatra tamin’ny lalàna frantsay mihitsy ny teo anivon’ny fitsarana avo momba ny lalàmpanorenana mba nentina nanamarinana izany. Mampametra-panontaniana sahady ny tena dikan’ilay tenin’ny filohan’ity andrim-panjakana ity na dia efa nohazavainy aza izay nilaza, raha tsiahivina, hoe “ity taona 2018 ity dia fotoana tokony hamerenana ny hasim-piandrianan’ny fanjakana Malagasy very sy novonoina ary nofafana tamin’ny fanjanahantany.” Fanambarana izay toa nifanipaka tamin’ny zava-nitranga omaly mihitsy, indrindra taorian’ny nandrenesana iny fakana ohatra tamin’ny lalan-dry zareo avy nanjanaka antsika iny. Samy nolazaina ho nitory tsy nisy porofo avokoa moa ny ekipan’ireo kandida roa na ny avy amin-dRavalomanana na ny avy amin-dRajoelina.

J. Mirija