Loisirs

Mpanakanto Nodimandry i Vaovy

Loisirs
Alatsinainy 08 Martsa 2010

Misaona ny tontolon�ny zavakanto Malagasy. Nodimandry teo amin�ny faha-62 taonany, tao an-tranony teny Andranonahoatra Itaosy ny alin�ny sabotsy 06 martsa teo, i Fanovona Jean Gabin fantatry ny maro amin�ny anarana maha mpanakanto hoe : Vaovy sy ny feo beso migobona.

Efa narary an-taonany maro izy, ary niditra hopitaly matetika. Ny 27 febroary no nivoaka ny hopitaly dia izao nindaosin’ny fahafatesana izao. Teraka ny 23 aogositra 1948 tao Ambovombe Androy i Vaovy. Mpanakanto feno, sady mpamoron-kira, no mihira no mitendry ihany koa. Mahatratra 300 any ny hira noforoniny hatramin’ny faha-17 taonany nidirany teo amin’ny habaky ny kanto. Nisy tamin’ireo no nohirainy toy ny “salakao”, “omeo rano” ary tao ny niarahany tamin’ny mpanakanto hafa. Ny “Groupe Artistique de l’Androy” (1965) no nisy azy raha namaky lay ny tontolon’ny hira. Efa mpitarika antoko mpihira protestanta ny tenany, izay niavaka tamin’ny rindram-peo ka anisan’ny nitsongana azy ho any Etazonia ny taona 1972. Ny taona 1974 no niforona ny tarika Vaovy, izay midika ho hazo mafy.

Nitrandraka sy nivoy ary nanandratra avo ny kolontsaina antandroy ary nampahafantatra izany eran’izao tontolo izao i Vaovy fahavelony. Nampitainy tamin’ny zanany izany, izay tsy vitsy koa no nanara-dia azy teo amin’ny sehatry ny hira. Ny taona 1984 izy no namoaka kapila 45tours, dimy, misy ireo hira tsy lefy toy ny “Lahimora Ko lay”, “Androy tane Mileven-drano”, “Omeo Rano”, “Salakao” ary ny “Talignere”. Ny taona 1994 ny fampisehoany voalohany teto Antananarivo. Rakikira roa no vitan’i Vaovy : “Angira”(1997) sy “Vamba” (2003). Tsy mbola nahazo fankasitrahana tamin’ny Fanjakana ny tenany nandritra izany.

Namela mananontena iray sy kamboty dimy izy izao nodimandry izao. Mangataka ny hiandrasana ny razana ao amin’ny tranompokonolona Analakely ny fikambanan’ny mpanakanto, mialoha ny hitondrana azy any Ambovombe Androy tany fiaviany. Mirary fiononana feno ho an’ny fianakaviny ny ekipa eto amin’ny gazety Tia Tanindrazana.

Jean D.