Zaza menavava nisy nanary tao Sambava

Mbola tsy fantatra izay Ray aman-dReniny

Actualités
Alatsinainy 12 Aogositra 2024

Mbola tazonin’ny tompon’andraikitra ao amin’ny Fokontany Analamaho,

distrikan’i Sambava hatramin’ny omaly Alahady 11 Aogositra ilay zazavavy kely menavava tombanana ho iray volana mahery nisy nanary tany an-toerana afak’omaly Sabotsy 10 Aogositra tokony ho tamin’ny 04 ora maraina. Raha tsiahivina kely ny tantara dia mpandalo tao amin’io tanana io no naheno feon-javatra, toa zaza mitomany. Ny andro anefa mbola maizina, ka samy nikoropaka izy ireo sao sanatria lolo vokatra izany. Na izany aza niara-nandeha nijery ilay toerana nandrenesana ny feo ihany izy ireo. Akory ny hatairany taorian’izany fa tena zazakely mitomany mitady nono mafy amin-dReniny tokoa ilay ren’izy ireo ka nampandrenesiny vy hatrany ireo tompon’andraikitra isan-tsokajiny. Noraisin’ny Fokontany ao an-toerana moa ilay zaza ary fantatra fa salama tsara tsy misy ahiana ny toe-pahasalamany. Tsiahivina fa somary nahazo vahana indray ny fanariana zaza menavava teto amintsika tato anatin’ny tapa-bolana izao. Zazavavy kely avokoa ny ankamaroan’izy ireny ary sendra olona tsara sitrapo avokoa.
Nangonin’i Pati