VOLANA JANOARY

Manomboka mivaro-pananana sahady ny olona

Actualités
Alarobia 08 Janoary 2025

Manao tohivakana indray ireo olona tazana mivaro-pananana eny amin’ireo toerana

mandray entana tonta eto an-drenivohitra sy ny manodidina. Raha araka ny fanadihadiana natao tamina Renim-pianakaviana iray mpandray ireny entana ireny etsy Ambodin’Isotry dia nanomboka tamin’ny Sabotsy 03 Janoary teo no nisian’izany ka ireo radio lehibe toy ny Subwoofer, ny vilany kokoty no tena be mpivarotra indrindra. Raha ny fanazavany dia nentina nanalana fotsiny ny fety tamin’ny ankapobeny no nividianan’ny tokantrano sasany azy ireny. Vao vita anefa izany ka lany ny teo am-pelatanana dia navadik’izy ireo vola indray izany mba handoavana saram-pianaran’ny mpianatra, ny hofan-jiron’ny JIRAMA….Nambaran’ity Renim-pianakaviana mpandray entana tonta ity hatrany fa na dia sahirana aza ny olona dia tsy manome vola eo noho eo ihany koa izy ireo fa tsy maintsy miandry. Eo amin’ny herinandro eo ho eo anefa raha ela izany dia voaloha. Tsy maintsy miandry mpividy ihany koa mantsy izy ireo ary tsy alefany izany raha tsy hahazoany tombony. Nomarihin’ity Renim-pianakaviana iray mpivarotra ity moa fa fotoana tena mampandeha ny tsenan’izy ireo ny vanim-potoana aorian’ny fety tahaka izao. Noho ny fahasahiranan’ny olona no nambarany fa antony mahatonga izany rehetra izany.
Pati
Legende : Ny Subwoofer tahaka izao no tena be mpivarotra indrindra amin’izao !