Actualités

Vidim-bary eny an-tsena Hanasazy ireo mpanararaotra ny fanjakana

Actualités
Talata 07 Novambra 2017

Mbola mampitaraina ny maro hatrany hatreto ny findangan’ny vidim-bary eny an-tsena, indrindra fa ny any amin’ny faritra ivelan’Antananarivo Renivohitra.

Efa mahatratra 640 Ar mantsy ny iray kapoaka amin’ny fotsimbary ho an’ireo vary zanatany toy ny vary gasy na dia nanambara aza ny minisitry ny varotra Atoa Chabani Nourdine omaly fa efa mitobaka be eto amintsika ny vary avy any ivelany. Anisan’ny ahitana izany ny ao amin’ny tsenan’Anosibe, hoy izy. Miantso ny mpanjifa mba samy hitaky ny tena vidim-bary marina hamidy eny an-tsena ity minisitra ity. Misy amin’ireo mpivarotra mantsy no tsy mametaka ny vidiny intsony fa ny mpividy indray no manontany, fihetsika hasehon’ireo mpaka tombony sy ireo mpanararaotra hamonoana ny madinika. Ho an’ireo izay tratra dia hisy ny sazy henjana omena azy ireny. Tsiahivina fa hisy ny mpanara-maso alefan’ny minisitera any amin’ireo faritra ivelan’Antananarivo Renivohitra manomboka izao mba hanara-maso akaiky ny vidim-bary.