FAHATAPAHAN-JIRO RN 1

Actualités
Alatsinainy 26 Oktobra 2026

Vokatry ny andrin-jiro nianjera sy ny

fipoahana tao amin’ny « sous station sud »
Tena tsy nisy izay tsy nitaraina ny amin’ny fahatapahan-jiro hiainany ireo mponina ao anatin’ny distrikan’Atsimondrano mivoaka ny lalam-pirenena voalohany, nanomboka ny Sabotsy teo.Araka ny fampitam-baovao avy amin’ny JIRAMA ho an’ny RN 1 dia vokatry ny fianjeran’ny andrin-jiro mitondra ny tariby THT (Très Haute Tension) teny Ambatomirahavavy, akaikin’ny lalana mankany Mikotsorano no nahatonga izany ka niteraka ny fahatapahan-jiro naharitra. Na izany aza efa niverina ny jiro.Teo am-pandaminana niaraka tamin’ny tompon-tany sy ny kaominina Ambatomirahavavy ny Jirama omaly. Lasa akaiky trano loatra mantsy io andrin-jiro io noho ny fanorenana nataon'olona taty aoriana ka mila fandravana ireo foto-drafitrasa ireo hisorohana ny loza sy iantohana ny jiro tsy ho tapaka. Ny fahatapahan-jiro omaly Alahady kosa indray dia vokatry ny fipoahana teo amin’ny vata fanapahana herinaratra tao amin’ny sous-station Tana-Sud, ka nahatonga fahatapahan-jiro hatrany Anosizato, lalam-pirenena voalohany manontolo sy ireo toerana hafa voakasik’izany. Tapak’andro teo ho eo no niainana izany fahatapahana izany tamin’ny ankapobeny.
Nangonin’i Pati
Legende : Ity ilay tranga niteraka fahatapahan-jiro tao Ambatomirahavavy !