Actualités

Partagé sur :
• facebook

Nitondra fanampim-panazavana ny minisitry ny asa sy ny lalàna sosialy omaly, fa afaka miasa hatramin'ny 5 ora hariva ireo orinasa rehetra amin'ny sehatra tsy miankina, tafiditra ao anatin'izany ny mpivarotra sy hotely.

Ny orinasa no mandamina ny fitaterana ny mpiasa mandroso sy miverina; tsy afaka miasa izay tsy mahavita io fitaterana io, hoy io Minisitra io. Mandamina ny fitaterana ireo mpiasa tahaka izany ihany koa ny ministera isanisany. Na tsy miankina, na ny fanjakana dia tsy maintsy voahaja ny fepetra ara-pahasalamana sy ara-pahadiovana ao amin'ny toeram-piasana ary hisy ny fitsirihana hatao. Midika io, fa natao ho an’ny orinasa matanjaka sy ny mpiasam-panjakana ny fahafahana miasa. Firifiry moa omaly ny mpiasa amin’ny sehatra tsy miankina nandeha an-tongotra? Mirava amin’ny 5ora hariva, ary alina vao tonga any an-trano. Vao mainka reraka eo dia tsy hanana hery fiarovana dia miditra tsimoramora ny Covid 19. Vitsy ny orinasa mahavita manao fitaterana ny mpiasany izany, ary tsy mbola mitovy amin’ny tamin’ny tsy nisy krizy rahateo ny fiodin’ny orinasa sy ny fampidiram-bolany amin’izao fotoana. Moa mba fantatry ny fanjakana ve izany sa tonga dia hoe: izay hifanosehanareo any ? Sao dia mba azo heverina ny famelana ny taksibe hiasa ka hatao 1000 Ar ohatra aloha ny saran-dàlana, ary iray ihany amin’ny sisiny andaniny sy ankilany ny olona azo entina ?

Toky R

Tia Tanindrazana

Samia mijoro ho an'i Gasikara.