Actualités

Trano eny Soaniedanana PK 67 Hatao mitovy endrika avokoa

Actualités
Sabotsy 21 Oktobra 2017

Hatao mitovy endrika avokoa manomboka izao ireo trano rehetra haorina ao amin’ilay tanàna vaovao natsangan’ny fikambanana HAFARI Malagasy eny Soaniedanana PK 67 lalam-pirenena fahefatra.

Notanterahina omaly ny hady fototra, notarihin-dRafanomezantsoa Jean Nirina, ampaham-potoana nohararaotina nandritra ny fametrahana ny vato fototry ny fiangonana FJKM vaovao ao an-toerana. Nasaina nanatrika ny lanonana ry zareo eo anivon’ny foibe FJKM sy ireo mpitarika eo anivon’ny fiangonana Fjkm Ziona Anosibe izay tsy nitsahatra ny nanatanteraka vondrom-bavaka tany an-toerana nandritra ny fotoana namitan’ny filoha nasionalin’ny HAFARI Malagasy ny saziny tany am-ponja. Nivoitra tao fa hitohy hatrany ny asa fanasoavam-bahoaka hotanterahin’ny fikambanana. Lohalaharana, ohatra, ny fijerena akaiky ireo ady tany, ny olana ara-tokantrano, ny resaka vola fisotroan-dronono ho an’ireo zokiolona ary koa ny momba an’ireo olona nindram-bola tany amin’ny banky nefa tsy manana fahafahana ny hamerina, fitarainana marobe efa voarain’ny fikambanana eo am-pelatanany sahady, taorian’ny nisokafany.

Pati