TOVOVAVY MALAGASY MATY TANY MAYOTTE

Tonga an-tanindrazana omaly ny nofo mangatsiakany, entina any Ambilobe

Actualités
Alatsinainy 11 Aogositra 2025

Nigadona an-tanindrazana omaly Zoma 08 Aogositra raha araka ny fantatra ny

nofo mangatsiakan'iArmella Florent, ilay tovovavy Malagasy vao 19 taona monja hita faty teny akaikin'ny tora-pasik'i Mliha Chanfi Mayotte. Raha tsiahivina kely dia tamin'ny Sabotsy 02 Aogositra alina lasa teo no nahitana ny razana. Mbola tsy fantatra kosa na novonoina izy na nolazoan'ny aretina, antony nitarika ny fahafatesany tahaka izao. Nisy moa ny diabe nataon'ireo vondrom-piaraha-monina Malagasy monina any Mayotte, nihazo ny seranam-piaramanidin'i Dzaoudzi omaly Zoma maraina ho fanaovam-beloma farany an'Itompokovavy. Nifanindry an-dalana tamin'izany ny fitakiana ny amin'ny tokony hamoahana ny marina momba ny nahafaty ity tovovavy ity no sady nisarihana ny sain'ireo tompon'andraikitra any an-toerana ihany lla. Voalaza efa nisy koa mantsy ny fanjavonan'ireo tovovavy malagasy tany an-toerana. Nisy moa ny tsipaipaika nataon'izy ireo ho fanampiana amin'ny fampodiana ny razana any Ambilobe.
Pati
Légende : Mafy ho an'ireo fianakaviany sy ny namany ny nanatrika ny vata nisy ny nofo mangatsiakan'Itompokovavy.