Tovovavy 16 taona voaolana sady bevohoka

Tovolahy 3 nidoboka vonjimaika eny Tsiafahy

Actualités
Alarobia 21 Febroary 2024

Ranolava ny tatitra mikasika trangana fanolanana saika manerana ny Nosy

amin’izao fotoana izao. Zazalahy miisa 3 izay samy mbola mpianatra avokoa no naiditra am-ponja vonjimaika eny Tsiafahy rehefa nanolana tovovavy 16 taona teny Anjanahary tamin'ny Oktobra 2023, araka ny tatitry ny Polisim-pirenena omaly. Tao anaty tambazotra sosialy Facebook no nifankafantaran'izy ireo ka nisy ny fihaonana voalohany teo amin'izy ireo teny Andravoahangy. Nentin'ilay tovolahy tany an-tranony teny Anjanahary niaraka tamin'ny namany roa hafa ilay zazavavy avy eo. Rehefa tonga tany an-trano anefa dia naolan'izy telo lahy ity farany. Taorian'ny fizahana natao azy dia fantatra fa bevohoka ilay zazavavy, hoy ny tatitra. Vokany, naiditra am-ponja eny Tsiafahy izy 3 lahy rehefa natolotra ny fampanoavana alatsinainy 19 Febroary 2024. Arakaraka ny fisian’ny fanintsian-dalàna izay andrasana fankatoavan’ny HCC na mifanaraka amin’ny lalàmpanorenana na tsia sy miandry didy fampiharana no toa vao mainka tsy mampahatotra ny mpanolana ? Sa efa izay ilay endri-javatra iainana eny amin’ny fiarahamonina hoe tena maro ny fanolanana fa nisy ny fikitihana ny fehezan-dalàna famaizana vao mitombo ny fahasahian’ny olona mitoroka ?
Toky R