Actualités

Partagé sur :
• facebook

“Mihena 68% ny harena voajanahary maneran-tany teo anelanelan’ny 1970 ka hatramin’ny 2016. Karazam-biby sy zavamaniry maro no efa lany tamingana.

Mitombo ny mponina eran’izao tontolo izao izay efa 8 miliara ankehitriny. Mitombo miaraka amin’izany ny filàna ara-tsakafo, ara-pitaovana, amin’ny lafiny angovo ary dia mitombo ihany koa ny fanimbana ny tontolo iainana. Nanomboka tamin’ny 1990 dia nihena 40% ny Loharanon-karena voajanahary na « Capital naturel » eran’izao tontolo izao kanefa ny famokarana dia nitombo avo roa heny. Mihamafy hatrany ny fiantraikan’ny fiovan’ny toetrandro toy ny fiakaran’ny hafanan’ny tany sy ny ranomasina, ny fitombon’ny entona mangeja hafanana amin’ny habakabaka, mitsonika ihany koa ireo ranomandry amin’ny tendron’ny tany” hoy ny tatitra « rapport planète vivante 2020 ». Manaitra hatrany ny voalazan` ity tatitra ity satria tandindomin-doza ny famokarana sakafo sy ny fahasalamana ary ireo zavamananaina isan-karazany satria tapaka ny fifandraisantsika taminy ary ny krizy maneran-tany nateraky ny Covid 19 dia ohatra mazava sy mivaingana amin’izany.Manamafy indray fa mifampiankina ny Natiora sy isika Olombelona, hoy ny “Planète Vivante”. Vokatry ny fikarohana nataon’ireo siantifika maherin’ny 125 amin’ny kaontinanta 5 eran’izao tontolo izao ity tatitra ity ary isaky ny roa taona no mivoaka izany ka mampiasa tondro manokana handrefesana ny fiantraikan’ny asan’olombelona amin’ny tontolo iainana izay antsoina hoe « Living Planet Index ».

Marigny A.

Tia Tanindrazana

Samia mijoro ho an'i Gasikara.