Tohana hametrahana fangaraharana ara-bola

Partagé sur :
• facebook

Manamafy ny fahavononany hampandroso ny mangarahara sy ny tamberin’andraikitra

ara-bola eto Madagasikara ny Amerikanina. Notokanana ny 22 aprily lasa teo ny Ivontoeram-piofanana vaovaon’ny SAMIFIN na ny Sampan-draharaha momba ny ady amin’ny famotsiam-bola sy ny famatsiana ny asa fampihorohoroana, izay nomena ny anarana “Ilohay”. I Etazonia no nanohana ara-bola ny fotodrafitrasa miaraka amin'ny teknolojia ao anatiny. Nanolotra fitaovana maromaro tamin'ny fomba ofisialy rahateo ny Amerikanina nandritra ny fitokanana, ka anisan'izany ny fahitalavitra, ny fanamafisam-peo, ny fitaovana fandikana teny ho an'ny olona 60, ny solosaina, ary ny fitaovana fitahirizana herinaratra ho fiarovana ireo solosaina. Ireo fitaovana ireo dia hanohana ny ezaka ataon'ny SAMIFIN amin'ny fanofanana ny mpiasam-panjakana, ireo mpiara-miombon'antoka, ary ireo manampahaizana manokana momba ny fitsikilovana ara-bola manerana ny firenena. “Faly i Etazonia manohana ny SAMIFIN amin’ny ady amin’ny heloka bevava ara-bola sy ny fampiroboroboana ny mangarahara”, hoy i Michele Russell, Tale Jeneralin’ny USAID eto Madagasikara. “Fampiasam-bola ho an’ny Malagasy ity ivontoeram-piofanana vaovao ity ary dingana iray mankany amin’ny fitantanana matanjaka kokoa sy azo ianteherana kokoa, raha ny fanazavana. Nahafantarana ny fandrosoan’i Madagasikara amin’ny famahana ny tolo-kevitra avy amin’ny Tatitry ny Tombantombana 2018 ny lanonam-pitokanana, ary nankalazana ny fanendrena ny firenena vao haingana ho eo anivon’ny komity mpitantana ny vondrona miady amin’ny famotsiam-bola any Atsinanana sy Atsimon’i Afrika, hoy hatrany ny fanazavana. Ny foibe vaovaon’ny SAMIFIN dia ho ivon-toeram-pikarohana sy fanofanana azo ampiharina amin’ny sampan-draharaham-panjakana sy ny anjerimanontolo ary ny fiarahamonim-pirenena. Navoitra fa hita taratra amin’io fotodrafitrasa io ny vina iombonan’i Etazonia sy Madagasikara amin’ny fananganana rafitra ara-bolam-panjakana mangarahara, ara-drariny, ary maharitra. Nandritra ny 40 taona mahery no niara-niasa tamin’i Madagasikara i Etazonia amin’ny fampiroboroboana ny fanjakana tsara tantana, ny fanatsarana ny asam-panjakana ary ny fanohanana ny vahoaka malagasy amin’ny fananganana hoavy matanjaka kokoa. Ny ivontoeram-piofanana SAMIFIN vaovao dia manampy amin'izany lova izany, manamafy ny ezaka hanamafisana ny andrim-panjakana demokratika, hampandrosoana ny fanjakana tan-dalàna, ary hampiroborobo ny fandraisana andraikitra ara-bola bebe kokoa. Mijoro hatrany i Etazonia amin’ny fiaraha-miombon’antoka amin’i Madagasikara amin’ny fananganana hoavy azo antoka sy handroso ho an’ny rehetra, hoy ny Fiadidian’ny Masoivoho Amerikanina eto Madagasikara.
Toky R

Tia Tanindrazana

Samia mijoro ho an'i Gasikara.