Thaïlandais sarona teny Ivato

Partagé sur :
• facebook

Lehilahy iray teratany Thaïlandais no voasambotra teny amin'ny seranam-piaramanidina

Ivato ny faran'ny herinandro teo, raha saika hiondrana tamin'ny fiaramanidina ET852 ho any Addis-Abeba hizotra any Bangkok. Nisy fambara rehefa nandalo tamin'ny "body scan" izy io, ka hitan'ny zandary avy amin'ny ANAF (Autorité Nationale Anti-Fraude), nisy zavatra miafina tao amin’ny fitombenanany (rectum). Taorian’izany, nentina haingana tany amin’ny HOMI na Hôpital Militaire ilay olona, ka niaiky fa nitelina vato sarobidy. Niditra an-tsehatra ny Police des Mines sy ny manam-pahaizana avy amin’ny minisiteran’ny harena an-kibon’ny tany. Namaritra izy ireo fa rubis mena 54, mitentina 59,3 grama no tao amin’ny vatan’ilay lehilahy, izay napetraka ho porofo tamin’ny "scellés" nataon’ny Douane. Nitohy ny sabotsy 12 jolay ny fanadihadiana, tao amin’ny Service des Renseignements et des Enquêtes de la Douane ao Antanimena, ka notanana atao andrimaso io teratany vahiny io. Tranga mampanontany tena momba ny fitaterana harena an-kibon’ny tany amin’ny fomba tsy ara-dalàna. Endrika maneho fa mety betsaka ny harem-pirenena mivoaka fa itony aloha no tratra. Raha kajy amin’ny vidin’ny "rubis rouge naturel", eo anelanelan’ny 1 000euros ka hatramin’ny 15 000euros isaky ny carat, dia mitentina 296,5 carats ny 59,3 grama. Araka ny tombana amin’ny tahan’ny fifanakalozana ankehitriny, izay manodidina ny 1 euro = 5 176 ariary, dia toy izao ny vinavina: Ambany indrindra: (296 500 × 5 176 = 1 534 684 000 ariary); Ambony indrindra: (4 447 500 × 5 176) = 23 020 380 000 ariary. Midika izany fa ny sandan’ireo rubis 59,3 grama dia mety ho eo anelanelan’ny 1,5 miliara ka hatramin’ny 23 miliara ariary, arakaraka ny kalitao sy ny fanamarinana ara-teknika. Mila mitrosa ve isika raha tena voafehy sy hain'ny Malagasy ary tsara tantana ny harem-pirenena?
Toky R
 

Tia Tanindrazana

Samia mijoro ho an'i Gasikara.