Actualités

Tatitry ny SAMIFIN 78 ireo trangana famotsiam-bola nohadihadiana

Actualités
Alarobia 14 Oktobra 2020

Anisan` ny misongadina amin` ireo raharaha nalefan` ny SAMIFIN teny amin` ny tendrom-pitsarana misahana ny ady amin` ny kolikoly (PAC) ny raharaham-barotra amin`ny fanfarana entana.

Eo koa ny fialana amin` ny fadin-tseranana na ny ladoany amin`ny alalan` ny hosoka ara-ketra. Manampy izany koa ny fandosirana na fialana ny hetra. Raha tsiahivina, 400 miliara ariary ny ahiana ho famotsiam-bola sy kolikoly ary fanodikodinam-bolam-panjakana tamin` ny taona 2019 raha toa ka 133 miliara ariary ny taona 2018. Namoaka tatitra amin` ny asa vitany nandritra ny sivy volana tamin` ity taona ity ny teo anivon` ny SAMIFIN ka tranga mampiahiahy miisa 125 no voarainy. Miisa 116 ireo raharaha efa vita fanadihadiana miampy trangana famotsiam-bola miisa 78. Tsy lavina fa tsy mbola misy firenena mahafehy 100% ny ady amin`ny famotsiam-bola na famatsiam-bola ny asa fampihorohoroana izany hatreto. Araka izany dia mila manatsara ny lalàna no sady mampihatra izany isika eto Madagasikara mba hahafahana manakaiky ny fenitra.

Marigny A.