Actualités

Nandefa delegasiona tany Alemaina ny minisiteran’ny varotra izay niezaka nandresy lahatra ireo mpandraharaha Alemaina nihaona taminy, handray ny entana avy aty Madagasikara. Raha ny fanazavan’Atoa Léonel, tale misahana ny varotra ivelany eo anivon’ny minisiteran’ny varotra dia  mpandraharaha alemaina am-polony no liana amin’ny fiaraha-miasa amin’ny malagasy. Hisy ary ny fampihaonana ireo mpanam-bola vahiny ireto amin’ireo orinasa malagasy izay hotontosaina amin’ny tapatapaky ny volana martsa izao. Ny fihaonana izay tanterahana anio eo anivon’ny masoivoho alemaina no hamaritra ny daty sy toerana ampihaonana azy ireo raha ny fanazavan’ity tompon’andraikitra ity ihany. Hatreto aloha izany dia tsy misy ny zavatra tapaka saingy heverina fa hanome aina ny fandraharahana eto an-toerana ity fiaraha-miasa ity raha tanteraka. Nanazava mantsy Atoa Léonel fa tsy havesatra loatra ny resaka haba satria samy nanasonia ny fifanarahan’ny APE na ny Accord de Partenariat Economique na isika na ry zareo Alemaina. Ny APE raha tsiahivina dia fifanaraham-piaraha-miasa eo amin’ny vondrona Afrique Caraibes Pacifique sy ny vondrona Eropeanina izay manome tombondahiny antsika firenena an-dalam-pandrosoana. «  I Alemaina no nosafidiana satria aorian’ny Etazonia dia izy no firenena faharoa mpanafatra lamba be indrindra maneran-tany. Ankoatra izay dia mbola malalaka ny tsena satria tsy mahatratra 1%-n’ny entana ilain’ny firenena Alemana akory ny totalin’ny entana vokarintsika », hoy i Léonel. Aorian’ity iraka ity dia ireo mpandraharaha Frantsay sy Italiana indray no horesena lahatra.