Sakoroka tao Manakara

Nopotehin’ny «cyclo-pousse » ny lapan’ny tanàna

Actualités
Alakamisy 07 Martsa 2024

Raikitra ny sakoroka tao Manakara Renivohitra omaly alarobia 06 martsa 2024.

Nopotehin'ny mpitondra Cyclo-pousse ny Lapan’ny tanàna. Io toerana io izay fotodrafitrasa miavaka, toy ny vakoka ao Manakara. Antony ny fanehoan'izy ireo ny fanoherana ny lamina napiharin'ny Polisy Monisipaly. Nidina an-dalambe ireo, ary nitokona, nanakan-dalana nanoloana ny Lapan’ny tanàna izy ireo omaly atoandro, ary nitohy tamin’ny famotehana fananam-bahoaka. Tapitra vaky ny ankamaoroan’ny fitaratra, tafiditra tany anatiny vato maro hany, ka potika hatramin’ny fitaovana samihafa tany anaty birao. Niditra an-tsehatra ny mpitandro filaminana nanaparitaka ireo mpirotaka, tamin’ny baomba mandatsan-dranomaso. Tena tsy azo nalamina sy tsy vita tamin’ny fifampiresahana ve fa tsy maintsy tonga amin’ny famotehan-javatra tahaka izao ? Moa tsy efa endrika fipoahana ara-tsosialy noho ny sehatra sy zavatra maro tsy voafehin’ny manam-pahefana ihany koa ve itony ka mirefotra rehefa tena feno ny kapoaka ?
Toky R