Raobelina Andry

Aza omena ny CENI ny.....

Actualités
Alarobia 13 Mey 2026

34 miliara Ariary hanavaozana lisi-pifidianana

Naneho ny heviny i Raobelina Andry taorian'ny fanapahan-kevitry ny fanjakana hirosoana amin'ny fanavaozana manontolo ny lisi-pifidianana hataon'ny CENI. Nanao ranty manokana ity Filoha Nasionalin'ny antoko Anjomara sy Rivo-baovao - ARB ity nilazany fa maro ireo fanapahan-kevitra lehibe tokony hiandry ny fikaonan-doham-pirenena, ka anisan’izany ny mikasika ny CENI. Nametra-panontaniana ny tenany manao hoe : "Ahoana moa no hanavaozana tanteraka ny lisi-pifidianana ao anatin’ny 12 volana ? Tsy adino ary tsy voafafa akory ireo zava-nitranga sy ny nataon’io andrimpanjakana io nandritra ireo fifidianana nifandimby teto amin’ny firenena, izay anisany nampiditra an’i Madagasikara tao anaty krizy". Mangataka amin’ny fitondram-panjakana ny tenany sy ny antoko ARB tarihiny mba "tsy hamoaka ilay vola 34 miliara Ariary kasaina hanatanterahana izany fanavaozana manontolo ny lisi-pifidianana izany". Fa maninona moa, hoy izy, no tsy ampiasaina ireo angon-kevitra efa azo avy amin’ny fisoratana anarana "biométrique" izay efa mandeha ankehitriny ? Efa mandeha ihany koa ny fanisam-bahoaka NUIS ho an’ny mpianatra. Raha ampifandraisina sy ampiasaina ireo tahirin-kevitra ireo, dia afaka miditra ho azy ao anatin’ny lisi-pifidianana ny olom-pirenena vao feno 18 taona. Miantso anareo tanora handray anjara mavitrika amin’ny fikaonandoham-pirenena izay ho tanterahina, i Raobelina Andry ary hanamafy mandritra izany ireo hevitra efa nentina teny an-kianja.
Nangonin'i Jean D.

Raobelina Andry, Filoha nasionalin'ny antoko Anjomara sy Rivo-baovao - ARB