Ralainirina Marcel

Partagé sur :
• facebook

Dingana lehibe no vita teo amin'ny

fiainana ara-politika teto Madagasikara tamin'ny naharava ny fitondran'i Andry Rajoelina. "Tsorina fa tena afa-doza ny Malagasy nialany teo", hoy i Ralainirina Marcel. Tena nanapotika zavatra maro iny fitondrana iny, hoy ity farany. Nandohalika ny toekarena noho ny ampihimamba nataon'ireo olombitsy nomen'ny fitondrany tombondahiny. Nanjaka ny kinamanamana, nirongatra ny kolikoly. Voahosihosy ny lalampanorenana. Nihatra aman'aina ny famoretana ary mety tapitra niditra am-ponja ny mpanao politika Malagasy nanohitra ny fitondran-dRajoelina rehefa tsy namoy ny ainy na nitondra takaitra raha mbola nitohy teo ny fitondran'i Andry Rajoelina iny. Rava ny fiarahamonina Malagasy, hoy hatrany ity Sekretera jeneralin'ny antoko Kintana ity. Koa isaorana ry Kolonely Michael Randrianirina sy ireo manamboninahitra niaraka taminy, nijoro ho endriky ny Tafika repoblikana nanilika ny mpangeja fahefana. Hentitra i Ralainirina Marcel nilaza fa "tsy hisy intsony izany Andry Rajoelina hiverina eto izany. Fito taona i Didier Ratsiraka no tany ivelany rehefa niongana teo amin'ny fitondrany, dimy taona i Marc Ravalomanana ka anjaran'i Andry Rajoelina indray koa izao, izy rahateo efa nisafidy ho Vazaha. Korontana ny fiverenany eto ka tsy hisy hanaiky an'izany eto. Tsy tokony avela ho vitavita ho azy koa ny famotehana firenena sy famadihana Tanindrazana nataony sy ny forongony ka anairana ny Fitsarana". Miaina ny fahalalahana ny Malagasy ankehitriny, hoy ity mpikambana ao amin'ny birao politikan'ny antoko Kintana tarihin'i Tabera Randriamanantsoa ity. Ilaina lamina sy fitsipika ary fampiharana ny lalàna anefa izany, hoy izy, mba tsy ho gaboraraka. Manohana ny fanavaozana ny Repoblika tarihin-dry kolonely Michaël ny antoko Kintana, hoy ny fanamafisany ary saropiaro amin'izany, ary tsy hipetra-potsiny manoloana ireo miketrika fanakorontanana. Handray anjara feno amin'ny fikaonandoham-pirenena ny antoko Kintana ary hitondra ny anjara birikiny amin'ny fanorenana ny firenena Malagasy.
Jean D.
Sary : Ralainirina Marcel, Sekretera jeneralin'ny antoko KINTANA.
 

Tia Tanindrazana

Samia mijoro ho an'i Gasikara.