Raharaha Ambohimalaza

Partagé sur :
• facebook

Vita omaly ny fakana am-bavany teo anatrehan’ny mpitsara mpanao

famotorana an’i Fenohasina ilay tompon’ny tsingerin-taona sy ny Reniny antsoina Olga dit Fafah. Izy mianaka ireo izay tratry ny fitoriana faobe. Taorian’ny fandinihan’ny mpitsara ny raharaha, noraisin’ireo mpitsara ny fanapahana nampiditra am-ponja vonjimaika io reniny io, raha toa ka napetraka eo ambany fianaraha-mason’ny fitsarana na « sous-contrôle judiciaire » kosa i Fenohasina, raha ny fanazavan-dRtoa Rakotoniaina Narindra Tonia mpampanoa lalàna eo anivon’ny Fitsarana Ambaratonga voalohany eto Antananarivo. Ity farany izay nilaza fa mahaleo tena tanteraka ny Fitsarana amin’ny fanapahan-kevitra izay iraisany. Nomarihiny fa tsy tsy voatery hitovy hevitra ny mpitsara mpanao famotorana sy ny fampanoavana, ka nanao fanohanana na « opposition » an’io fanapahan-kevitra nametraka an’i Fenohasina ho eo ambany fanaraha-mason’ny Fitsarana io ny fampanoavana. Nalefa teo anivon’ny « chambre de détention » ny fanohanana, ka namoahana didy ny hamonjana an’ity tompom-pety ity io sampana eo anivon’ny Fitsarana io. Araka izany, nidovoka am-ponja vonjimaika ihany koa i Fenohasina. Nambara fa mitohy ny famotorana sy fandalinana ny raharaha, ary rehefa feno izany rehetra izany dia hatolotra ny Fitsarana momba ny heloka bevava ireo voarohirohy rehetra. Tafakatra 5 izany hatreto ireo olona nadoboka am-ponja vonjimaika tamin’ity raharaha ity. Na izany aza, mbola betsaka ny zavatra manjavozavo manodidina an’ity raharaha ity, saingy efa hizingizinin’ny Fanjakana notarihin’ny Filohan’ny Repoblika moa hoe : izao no marina, dia mizotra manaraka an’izay ny fandehan’ny toe-draharaha. Ity raharaha nahafatesan’olona 32 ity izay toa takotakon’ny raharaha boeing 777 tato ho ato, kanefa tokony tsy ho vita mora sy tsy ho matimaty foana ireo lasibatra tao anatin’ity raharaha ity, ary tokony hivoaka ny tena marina.
Toky R
 

Tia Tanindrazana

Samia mijoro ho an'i Gasikara.