Pr Yvette Rabetafika

Partagé sur :
• facebook

Niamboho ny alahady 15 jona teo amin'ny faha 83 taonany i Pr Yvette Rabetafika,

vadin'ny Pr Ranjeva Raymond. Vehivavy nanana ny maha izy azy teo amin’ny tontolon’ny fikarohana sy sehatra maro. Niavaka, tsy tia sehoseho kanefa tena nanana ny maha izy azy tamin'ny lalana nodiaviny. Be fikirizana sy filamatra ho an’ny an’ny rehetra! Izy no vehivavy voalohany nahazo « agrégation d'anglais » tamin'ny taona 1966, fony izy vao 24 taona monja. Anisan’ny reharehan’ny Malagasy, vavolombelon’ny fitiavan-tanindrazana sy ny fanandratana ny maha izy azy satria teto Madagasikara no namitany ny fianarany. Mbola mpianatra izy dia efa nampianatra tany amin'ny kolejy protestanta, avy eo lisea izay vao niakatra teny amin'ny oniversite. Lasa mpampianatra mpikaroka taty aoriana. Izy no vehivavy voalohany voatendry ho ambasadaoron'i Madagasikara teo anivon'ny UNESCO. Andraikitra nahafahany nandray anjara tamin'ny famerenana amin'ny endriny tena mitovy ny lapan'i Manjakamiadana, Rovan'i Madagasikara. Efa mpikambana tao amin'ny Haut Conseil de la Francophonie sy solontena manokan'ny filoham-pirenena tao amin'ny OIF (Organisation Internationale de la Francophonie) koa izy. Mpikambana tao amin'ny Akademia malagasy sy ny Académie des Sciences d’Outre-mer ary ny Académie Africaine des Sciences, religieuses, sociales et politiques. Nandray anjara mavitrika tamin’ireo fikambanana akademika, koltoray, sosialy fivavahana izy. Mpikambana tao anatin’ny SERA (Sehatry ny Raiamandreny) izay nijoro ho arofanin’ny Firenena manoloana ny zava-misy ankehitriny ihany koa i Pr Yvette Rabetafika. Manamafy ny fiombonana alahelo sy maniry fiononana feno ho an’ny fianankaviana manontolo isika eto amin’ny Tia Tanindrazana.
Toky R

Tia Tanindrazana

Samia mijoro ho an'i Gasikara.